Prumîre lète da Paul aus djins d’ Corinte/IV
IV
1. Adon, qu’on nos rwaîte come dès vaurlèts da Christ èt dès arindjeûs dès mistêres dau Bon Diè.
2. D’ayeûrs, çu qu’on dmande dès-arindjeûs, c’èst qui chaque seûye fidêle.
3. Por mi, dji m’en fou dè yèsse djujé pa vos-ôtes ou pa lès djujes dès-omes. Dji n’ mi djuje nin non pus mi-minme,…
4. pasqui dji n’a rin dissus l’ consyince ; mins ci n’èst nin po ça qui dji so djujé ; li çi qui m’ djuje, c’èst l’ Sègneûr.
5. Volà poqwè i n’ faut rin djujer divant li timps, divant li vnoûe dè Sègneûr, qui frè blawter çu qui èst catchi dins l’ nwar èt qui mosturrè lès visées dès coeûrs. Adon, l’omadje da chaque vêrè dèl paurt dau Bon Diè.
6. Mes fréres, dj'a pris cès-imaudjes à propos d’Apollos èt d’ mi, à cause di vos. Insi, vos-apidroz à n' nin aler pus lon qui çu qui èst scrît èt nuk di vos-ôtes ni s’ vantrè en tnant avou onk conte l’ôte.
7. Pasqui, quî èst-ç' qui vos rind difèrins ? Qu’avoz qui vos n’avoz nin rçû ? Et si vos l’avoz rçû, poqwè si vanter, comme si vos n’ l'avîz nin rçû ?
8. Dèdja, vos n’avoz nin fwin ; dèdja, vos-èstoz ritches ; sins nos, vos-avoz cominci à yèsse rwès ; èt qui v' pluchoche yesse rwès, ayi, po qui nos-ôtes ossi, nos sèyanche rwès avou vos !
9. Pasqui li Bon Diè a faît di nos-ôtes dès apôtes, lès dèrins dès-omes, condanés à mwart, d’one maniére, pousqui nos-avans stî mostrés au monde, aus-andjes èt aus djins.
10. Nos-èstans loignes à cause di Christ, mins vos, vos-èstoz convnâbes en Christ ; nos-èstans flauwes, mins vos-èstoz fwarts ; vos-èstoz rimplis d’ glwère èt nos n’avans pupont d’oneûr !
11. Jusqu’asteûre, nos-avans fwin, nos-avans swè, nos-èstans tot nus, nos-èstans batus, nos n’avans pont d’ maujone.
12. Nos nos naujichans à ovrer avou nos mwins ; engueûlés, nos bènichans ; condanés, nos supwartans…
13. …mèprisés, nos consolans ; nos-èstans divnus lès brouchteûs dè monde, lès baraquîs da tortos, jusqu’asteûre.
14. Ci n’èst nin po qui vos soyoche djin.nés qui dji scrî ça ; mins dji vos tins au courant come mes bininmés-èfants.
15. Bin sûr, quand minme vos-auroz dès mile maîsses en Christ, vos n’avoz quand′ minme nin pusieûrs péres, pousqui c’èst mi qui vos-a mètu au monde, en Christ, pa l’Èvanjîle.
16. Dji vos dmande aloûrs′ dè fé come mi.
17. Po ça, dji vos-èvoûye Thimothée, qui èst mi-y-èfant bininmé èt complice dins l’ Sègneûr. I vos rapèlrè mès voûyes dins l’ Christ, comme dji lès raconte tos costés, dins totes lès-Èglîjes.
18. Saquantes s’ènn′ ont vanté, comme si dji n’ diveu nin aler addé vos.
19. Mins, dj'îrè bin rade, si c’èst çu qui l’ Sègneûr vout èt dji conichrè, nin lès dîres, mins li pouvwêr di cès vantârds-là.
20. Pasqui li monde dau Bon Diè n’èst nin dins lès dîres, mins en pouvwêr.
21. Qui vloz ? Qui dji vauye addé vos avou on ramon ou avou amichtauvté èt doûceûr ?