Prumîre lète da Paul aus djins d’ Corinte/V

Èn årtike di Wikisource.
Ciste ouve ci egzistêye eto divins ds ôtès ortografeyes : Ortografeye do scrijheu - Rifondou walon.

V

1. On ètind tot l’ timps causer qui vos vos tinoz mau ; èt vos vos tinoz télmint mau qui c’est co pîre qu’èmon les cis qui n’ crwèyèt nin ; c’èst télmint pîre qu’i-gn-a onk di vos-ôtes qu’a li feume di s’ papa !

2. Et vos èstoz télmint poûris di n' tûzer qu’à vos-ôtes qui vos n’avoz nin pris l’ doû po qui li ci qui a faît ça seûye foutu à l’uch di vosse soce.

3. Por mi, qui n’a pupont d’ cwâr, mais qui a co m’ tièsse, dj'a dèdja mètu on djujmint, come si dj’esteûve là, su li ci qui a faît ça.

4. Pasqui, au nom dè Sègneûr Jésus, vos èt m’ tièsse, nos estans rachonés avou li pouvwêr dau Sègneûr Jésus.

5. Qu’on tél ome seûye tapé au Diâle po distrûre les cwars po qui l’ tièsse seûye sipaurgnîe li djoû dau Sègneûr Jésus.

6. Èle n’èst nin fwart bèle, vosse glwère : ni savoz nin qu’one miète di lèveûre faît monter tote li pausse ?

7. Rissatchoz vosse vîe lèveûre po divnu one novèle pausse pusqui vos-èstoz sins lèveûre, pasqui Christ, nosse Pauque, a stî touwé.

8. Adon, fians l’ fièsse, nin avou dèl vîe lèveûre, ni avou one lèveûre di mètchançté, mins avou les pwins sins lèveûre di ç’ qui est l’ vraîy.

9. Dji vos a scrît dins m’ lète di n' nin yu dès rapoûrts avou les dislachîs.

10. Des çi qui vos dijèt qu'i sont vosse frére, mins qui sont pice-crosse, dès bèveûs, dès vaurins, dès voleûrs…

11. …èt minme dè n’ nin mougni avous ces djins-là.

12. Qu’èst-ç' qui dj'a à pwarter on jujmint po les cis qui sont foû ? N’èstans n' nin djujes dès cis qui sont ddins ?

13. Li ci qu’èst foû, c’èst l’ Bon Diè qui l’ djujrè ; foutoz à l’uch les mètchants qui sont co avou vos.