Prumire lete da sint På ås djins d’ Corinte/IV
IV
1 — Adon, k’ on nos rwaite come des vårlets då Criss eyet des arindjeus des misteres då Bon Diu.
2 — Dayeur, çou k’ on dmande des arindjeus, c' est ki tchaeke soeye fidele.
3 — Po mi, dji m’ è fote d' esse djudjî på vozôtes u pa les djudjes des omes. Dji n’ mi djudje nén mi-minme nerén,…
4 — …paski dji n’ a rén sol consyince ; mins ci n’ est nén po ça ki dji so djudjî ; li ci ki m' djudje, c' est l’ Signeur.
5 — Vocial pocwè i n’ fåt rén djudjî dvant l' tins, divant li vnowe då Signeur, ki frè blawter çou k' est catchî dins l’ noer, eyet ki mosterrè les vizêyes des cours. Adon, l’ don da tchaeconk vénrè direk då Bon Diu.
6 — Mes frés, si dj' a prindou ces imådjes la å dfwait d' Apollosse eyet d’ mi, c' est å cåze di vos. Insi, vos aprindroz a n' nén daler pus lon ki çou k' est scrît, yet nuk di vozôtes ni s’ vantrè e tnant avou onk conte l’ ôte.
7 — Paski, cwè çki vos rind diferins ? K’ avoz k' vos n’ av nén rçû ? Yeyet, si vos l’ avoz rçû, pocwè s' è vanter, come si ça vénreut d' vos-minmes, et nén l' awè rçû ?
8 — Dedja k' vos n’ avoz nén fwin, dedja k' vos estoz ritches, sins nos, vs avoz comincî a-z esse rwès ; ki vos ploxhe esse des rwès, iva ! po k' nozôtes ossu, nos soeyanxhe des rwès avou vozôtes !
9 — Paski l' Bon Diu a fwait d' nozôtes des apoisses, les dierins des omes, codånés a moirt — d’ ene manire, puski nos avans stî mostrés å monde, åzès andjes, et ås djins.
10 — Nos estans loignes a cåze do Criss, mins vos, vs estoz dujhåves e Criss ; nos estans flåwes, mins vos estoz foirts ; vs estoz rimplis d' glwere eyet nos n’ avans pupont d’ oneur !
11 — Disk’ asteure, nos avans fwin, nos avans soe, nos estans tot nous, nos estans batous, nos n’ avans pont d’ måjhone.
12 — Nos nos nåjhixhans a ovrer avou nos mwins ; egueuyîs, nos benixhans ; codånés, nos sopoirtans…
13 — … dismeprijhîs, nos rconsolans ; nos estans divnous les broushteus do monde, les barakîs da tertos, disk’ asteure.
14 — Ci n’ est nén po k' vos soeyoxhe djinnés ki dji scrî ça ; mins dji vos tén å corant come mes binamés efants.
15 — Bén seur, cwand minme vos årîz des meyes di mwaisses dins l' Criss, vos n’ avoz cwanlminme nén puzieurs peres, poy ki c’ est mi ki vs a metou å monde, dins l' Criss, pa l’ Evandjîle.
16 — Adon, dji vos dmande di fé come mi.
17 — Po ça, dji vos evoye Timotêye, k' est m'-n binamé efant eyet mi soçon dins l’ Signeur. I vos rapelrè mes voyes dins l’ Criss, come dji les raconte pattavå, dins totes les Eglijhes.
18 — Sacwants s’ end ont vanté, come si dji n’ diveu nén aler addé vos;…
19 — …mins, dj' î irè bénrade, si c’ est çki l’ Signeur vout, yet dji conoxhrè, nén les dires, mins li povwer di ces cråneus rola.
20 — Paski li monde då Bon Diu n’ est nén dins les dires, mins dins l' polance.
21 — Ki vloz ? ki dji våye addé vos avou on ramon u avou amiståvté yet doûceur ?