Wice ki ça finixh drole
Li çmintire di Glaireuse est metowe å cou del pitite tchapele, tot do long del voye d’ Anloe, avou ene coine ki va betchî å Tchamp Herman. Ene pitite poite di fier tote eruneye ki tchîpele cwand on l’ drove ; des grands noers ciprès kel ravôtièt di ttåtoû, come po-z espaitchî les moirts ki n’ sont nén ahessîs di cori voye trop åjheymint ; des tombes di totes les ådjes et di totes les sôres : des viyes ki n’ sont pus etertinowes ki c’ est tos waezons et totes nichtés, disk’ å cåvea do Conte del Rotchete, k’ i gn a nén on snè, ene rampe u ene rabrouxhe k’ a l’ droet di vni båker, ni soeye-t i k’ e rexhant l’ dibout d’ si binete, sins s’ fé raboter l’ grognon seyance tinante.
« Li cene di nosse Noyete, c’ est l’ dierinne del rîlêye di dzo, dit-st i l’ pere. » Ele trintche dins les ôtes, ca i gn a pont d’ croes, mins on grand boket d’ blanke pire ås troes costés, come c’ est les tombes modienes, asteure.
Mins, mildju, cwè çki c’ est bén d’ ça ki trinne la al tere, dilé l’ boirdeure ? Ti n’ direus come ene blanke tikete fene cafougneye.
Dji fwai troes ascoxheyes come des hazêyes d’ on live epoenté pås tchéns, pu dj’ m’ arestêye tot djus, clawé la.
Djezuss Mareye Djôzef ! c’ est on mousmint… ene blanke camizole.
Dji vole dissu ; djel discafougne vormint, dj’ avize li plaece del gavêye, a droete et cwè çki dj’ voe ?
On rodje cour !
Kékes candjmints d’ mots, eneviè l’ mwaisse tecse : « Noyete » po Nowele (vî ptit no ritrové dins les Noyés walons ; « ciprès » po « tiyoûs » (l’ åbe li pus corant åtoû des aites).