Leyîz m’ plorer

Ciste ouve ci egzistêye eto divins ds ôtès ortografeyes : Mwaisse modêye —  Feller —  Rifondant walon.

Nicolas Defrecheux

Leyîz m’ plorer

rortografiaedje da Lucyin Mahin

L’ Aberteke, 2004

Schoûtez Lucyin Mahin emey tchapele
(prononçaedje zero-cnoxheu)

Leyîz m’ plorer

I.

Mes camaerådes m’ ont vnou dire : « C’ est nosse fiesse,
Vinoz danser ! »
K’ èn ôte s’ amuze ; mi, dji pleure li mwaistresse
Ki m’ a cwité.
Dji l’ inmeu tant ; elle aveut mes pinsêyes
Di nute et d’ djoû.
Leyîz m’ plorer ! Tote mi veye est gåtêye,
Dji l’ a pierdou ; awè dji l’ a pierdou !

II.

Ses ptitès mwins avént l’ minme blankixheur
Ki nos feus d’ lisse.
Et ses deus lepes estént pus rôzes ki l’ fleur
Di nos rôzîs.
Måy nole fåbite n’ a fwait oyî come leye
Des tchants si doûs.
Leyîz m’ plorer ! Tote mi veye est gåtêye,
Dji l’ a pierdou ; awè dji l’ a pierdou !

III.

Vos årîz dit kéke andje vinou sol tere
Divins l’ moumint.
Ele pårtixheut totes ses spågnes al mizére
Des ôrfulins ;
Ou k’ elle aidive si viye mére al vesprêye
Po rmonter l’ soû.
Leyîz m’ plorer ! Tote mi veye est gåtêye,
Dji l’ a pierdou ; awè dji l’ a pierdou !

IV.

Dji n’ pou rovyî k’ el såjhon des violetes,
Ele mi dérit :
Louke ces oujheas apîçtés sol coxhete…
Ki fiestèt i ?
Va, cwand on s’ inme, tos les djoûs d’ ene anêye
Sont des beas djoûs,
Leyîz m’ plorer ! Tote mi veye est gåtêye,
Dji l’ a pierdou ; awè dji l’ a pierdou !

V.

Elle est asteure eco pus hôt k’ les stoeles,
E paradis.
Pocwè fåt i k’ ele soeye evoye tote seule,
Evoye sins mi ?
On a bea m’ dire : « I fåt bén k’ tel roveyes ! »
Est çki djel pou ?
Leyîz m’ plorer ! Tote mi veye est gåtêye,
Dji l’ a pierdou ; awè dji l’ a pierdou !