Mes camèrådes m’ont vnou dîre :
« C’est nosse fiesse, vinez danser ! »
K’in ôte s’ amûze ; mi,
dji pleure li mêtresse ki m’a cwité.
Dji l’inméve tant !
elle aveut mes pinsêyes di nute et d’djoû.
Lèyîz m’plorer ! tote mi veye est gåtêye,
dji l’a pièrdou ; dji l’a pièrdou !
Ses ptitès mins avît l’minme
blankixheur ki nos feus d’ lis.
Et ses deus lèpes estît pus rôzes
ki l’ fleur di nos rôzîs.
Måy nole fåbite n’a fêt oyi
come leye des tchants si doûs.
Lèyîz m’plorer ! tote mi veye est gåtêye,
dji l’a pièrdou ; dji l’ a pièrdou !
Vos årîz dit kéke andje vinou
sol tere divin l’ moumint.
Ele pårtixhéve totes ses spågnes
al mizere des ôrfulins ;
Ou k’ elle êdîve si veye mére
al vesprêye po rmonter l’soû.
Lèyîz m’plorer ! tote mi veye est gåtêye,
dji l’a pièrdou ; dji l’ a pièrdou !
Dji n’pou roûvî k’el sêzon des violètes,
èle mi dérit :
Louke cès oûjhês apîstés sol coxhète,
Ki fiestèt i ?
Va, cwand on s’inme,
tos les djoûs d’ine anêye
Sont des bês djoûs,
Lèyîz m’plorer ! tote mi veye est gåtêye,
dji l’a pièrdou ; dji l’ a pièrdou !
Elle e-st asteure èco pus hôt k’les steules,
è paradis.
Pocwè fåt i k’èle soeye evôye tote seule,
èvôye sins mi ?
On a bê m’ dire : « I fåt bin k’t’el roûvèyes ! »
Eski dj’el pou ?
Lèyîz m’plorer ! tote mi veye est gåtêye,
dji l’a pièrdou ; dji l’ a pièrdou !