Spôrts
Et vla co ène pâdje di l’ istwêre du spôrt qui s’ èva ratoûrner !
Èç côp ci, c’ est ène pâdje di l’ istwêre d’ èl formule yin qui vént d’ ès toûrner, rola au Brésil èt pus spéciâlmint a Sao Paulo. El 22 du mwès d’ octôbe 2006, Michael Schumacher a stî fiestè come i s’ dwèt pa tous les céns qui boutnut dins s'-n écurîye èt ètou pa s’ famîye.
Èç-n ome la, c’ est in monumint a li tout seû ! Dji m’ rapèle èl côp qu’ dj’ aveu stî l’ vîr couru a Francôrtchamp. Gn a nén a dîre, mins i léra in grand vûde dins l’ keûr des amateûs di formule yin !
Èç côp ci, il a satchi s’ rèvèrince. Parètreut qu’ il a dit qu’ i n’ esteut nén disbautchi d’ ès djoquer, pace qu’ adon il âreut continuwè a couru.
Et au cominchmint !
Qué mémwêre, no Ptit Louwis. L’ ome aveut cominchi a couru en F1 en 1991. C’ esteut pou l’ écurîye Bènèton. Èç-n anéye la, pou s’ deuzième Grand Pris (a Monza), il aveut lachi padvant les gazètîs qu’ i crwèyeut qu’ ène vwètûre di formule yin esteut pus malaudjîye qui ça a mwin.ner. Vos vos rindèz compte di ç’ qui troteut ddja dins s’ tiesse adon.
Mi, çu qu’ dji préfère dins les coûsses insi, c’ est quand is pârtnut èt qu’ i gn a ds accidints. Dèl tôle frwesséye, hin, mins nén des môrts come èl pôve Ayrton Senna a Imola en 1994.
Pou dè rvènu a Choumi, èl vûde sra dificilmint rimpli. Et co, is dvront s’ mète a saquantes. Li, ès pâlmaresse est tèrîbe, èt on n’ sâreut tout lomer : les sèt tites di tchampiyon du monde, ses 91 victwêres, ses 154 podioms, ses 13 victwêres dissu l’ min.me séson (en 1994) èt tout l’ restant.
Mins "Mitchî Choumake" est tout d’ min.me èn ome. Quand, après l’ coûsse, il a arivè a s’ motorôme, i s’ a tout d’ min.me mètu a brêre. Qwè vléz, on n’ satche nén ène rôye dissu ène câryîère di 16 anéyes passéyes au volant d’ ène vwètûre di formule yin èt co miyeu a l’ tiesse d’ èl coûsse, sins awè ene miyète di nostaljîye.
Faut dîre ètou qui ses spales estit ene goute escrandes a‑z awè dmeuré au pus waut nivau. D’ après s'n atatchéye di presse, l’ ome esteut scran tant fizicmint qui mentalmint. A 37 ans, ès côrps n’ encaisse pus les èfôrts come dins l’ timps. Les entrin.n'mints tèrîbes d’ au mwins trwès bounès eûres d’ egzèrcisses par djoû sont deûrs, sins roubliyî ètou l’ pressiyon des médias èt d’ ses supôrtèrs.
C’ est seûr malaudji d’ yesse yin des pus grands spôrtifs di tous les timps !
Des ôtes coureûs ont bén cachî d’ ès mète dissu s’ tchimwin, mins is n’ ont nén seû bârer l’ vôye a no Schumi. C’ est seûr qu’ i gn-âra des rcôrds qui n’ sèront jamés batus. Il a vrémint mârquè l’ espôrt automobile.
Pou s’ dèrène coûsse, i n’ a pont yeû d’ tchance, min.me auzès sèyances d’ essais. Et co pîre durant l’ coûsse, avou l’ èpneû qu’ a crèvè. Mins pour li, rén n’ a candjî, sinon bran.mint dpus d’ gazètîs a l’ arivéye. A ! sifét. Ès casque, wou ç’ qu’ on-z aveut mârquè les nôs d’ ses 91 victwêres (di Bèljîque en 1992 a Shanghai en 2006).
A paurt çoula, pour li, quand i monte dins s’ vwètûre,c’ est l’ boutâdje di tous les côps.
Pou les céns qui wèynut voltî l’ formule yin, l’ ome dimeurra toudi l’ lumèrô yin dins les keûrs. Tant k’ a l’ passiyon d’ èl vwètûre di coûsse, èle dimeurra ètou, mins i faura du timps pou-z ariver a wéti des Grands Pris sins li, en s’ dijant qu’ avou Schumi, ça âreut stî pus spitant èt qu’ gn âreut yeû pus d’ espèctake.
Mins ba ! qu’ i s’ rapauje bén ! I l’ a bén mèritè, no Choumi !
escrît èl 10 di djanvî 2007; li mwaisse tecse a stî wårdé, mins ene miete rarindjî