Spôrts: les tchafiaedjes do Ptit Louwis (5)
- Dji wè voltî tous lès spôrts, èyèt surtout lès céns qui s’ djouwnut avou in balon ou bén ène bale. Eyèt minme ène pètite, come èl tènisse. Dji m’ vos va don dviser audjourdu da Serena, yène des deûs cheûrs Williams.
Come saquants grands djouweûs di tenisse, èle vént dè rvènu après deûs anéyes sins quazimint djouwer. Pourtant, i gn a saquantès anéyes did ci, su l’ fén 2002, elle aveut rèyalizè çu qu’on lome èl Grand Chlim. Adon, on pout dire qu’elle esteut au dzeû du paquet avou ètou ès cheûr Vénus qui djouweut ètou les prumîs roles. Adon, les djins qui wèyît voltî èl tenisse n’avit pus wêre di pléji a chûre leû spôrt préfèrè, ca les deûs femes gâgnît quazimint tous les tournwès. I gn aveut pont d’ suspinse. I lyeû faleut signer l’ foûye pou s’inscrire èt on concheut l’ cène qu’aleut gâgnî. Il a falu qu’in ptit payis qu’on lome el Beljique vègne avou deûs djouweûses loméyes Justine èyèt Kim pou qu’on wèye ène miyète di spèctaque ôte qu’avou les deûs cheûrs. Nos deûs Beljes ont adon cachî d’ cobouter l’ clasmint èt après, i gn a yeû ètou toute ène rîléye di Russes qu’ont-st arivè.
El supérioritè Williams a cominchî a s’ djoquer viè l’esté 2003. Mins c’est l’ vré ètou qui les deûs cheûrs fèyît pârler d’ yeûsses grâce a toutes sôtes di féts divièrs. Etou, come tous les spôrtifs, elle ont yeû des rûzes avou leu santè pou Vénus èyèt surtout di djnou pou Serena. On pinse tout d’ minme a ène victwêre a Melbourne en 2005. C’esteut rola yène des seûles dins les dérènès anéyes.
Pourtant, wôrs des djès, on ètindeut tout d’ minme èdvizer des Williams. Elle ont stî choquéyes pa l’ môrt di leû dmi-cheûr dins in réglemint d’ comptes a Los Angeles. Maugré ses cwachûres, Serena bouteut ôte paut. Ele fyeut des dessins d’ môde, èyèt elle a ètou pârticipè a des toûrnâdjes di sériyes pou l’ bwesse as imâdjes.
On n’ crwèyeut d’ayeûrs pus les rvîr dissu in tèrén di tenisse. Serena aveut djusse djouwè quatôze tournwès en deûs anéyes. Elle esteut ètou diskindûwe a l’ cint quarantième place du clasmint mondiâl.
C’èst en djouwant au tenisse qui dji seû l’ pus binauje !
Quand Serena a lachi ç’ frâse la el vèye di l’Open d’Australiye 2007, on nel crwèyeut nén. Les spécialisses nèl pèrdît nén du tout au sérieûs. Eyèt pourtant, ele vént d’ bate rola a Mèlbourne èl cène qu’ est dvènûwe èl preumière djusse après, Maria Sharapova, en n’ lî lèyant qui trwès djès (6-1 èyèt 6-2). Lèye, elle est arivéye djusse après el lumèrô quatôze au clasmint WTA. Çoula parèt impossîbe, èyèt pourtant, … Sauf qui c’est l’ pus grande djouweûse di tous les timps. Ele a ène saqwè qui …, elle a deûs ârmes tèrîbes qu’on lome pwuissance èyèt mintâl. Rola, pou s’ rintréye en Australiye, elle a batu les lumèros 5, 11, 16, 10 èyèt ètou l’ futûre preumière djouweûse du monde. Vla in rtoûr qui dwèt fé mau. Ene saqwè qui les ôtès djouweûses, champiyones du momint, duvnut accepter en wèyant Serena Williams qui rvént insi di quazimint nule paut èt après ds anéyes sins l’awè vèyu al coupète èyèt dsu les tèréns.
D’après ses dèclarâciyons auzès gazètîs, Serena a l’espwêr di co souvint rescontrer Sharapova. Ele voureut d’ayeûrs djouwer ène anéye ètîre pou n’ nén qu’ ça dmeure in rtoûr d’in mérseû tournwè.
Justine èyèt Kim avît dèdja rvènu des profondeûs du clasmint pou-z ariver dins les preumîs. Mins tout d’ minme nén d’in parey pwint ! Ele vént co dèl prouver avou s’ victwêre dissu no Justine au tournwè di Miyami. El finåle, Juju a stî rdoubléye 0‑6, 7‑5, 6‑3 pal Serena.