Walonreye / Spôrts
- C’ est l’ vré qui dji wè pus voltî les spôrts di balon ou d’ bale. Mins les ôtes, ça m’ convént ètou. Wétèz in pô pou l’ motocross. L’ ôte djoû, djè m’ é rindu a Nameûr.
Dissu l’ grand tèrén, au dzeû dèl Citadèle (i m’ a falu monter a pî), au cominchmint du mwès d’ awousse, gn aveut l’ Grand Pris d’ Walonîye qui s’ coureut en moto. Rola, Stefan Everts a fiestè s’ dîjième tite mondiâl s’ i vos plét.
- Vos vos rindèz compte, c’ est in coureû del race dès tchampions, hin !
Il a mârquè l’ èspôrt du motocross èt a tout gâgnî. Si on r’ wéte di pus près ès’ “pâlme a resse”, il a l’ pâlme èt i n’ resse pus rén. Dispu l’ 125 du cominchmint djusqu’ a l’ pwuissante quate timps d’ asteûre, en passant pa l’ 250 èyèt l’ 500. Eçn ome la a in pâlmarès come pont d’ ôte.
Au cominchmint d’ l’ anéye, Stefan Everts aveut vlu fé in pari avou li-minme. D’ acôrd, come direut l’ ôte, i ‘ steut l’ mésse dès labourès, mins did la a fini s’ cârîyère avou ene cintène di victwêres a s’ prope compteû, c’ esteut ene mîyète fôrt. Minme lès pus spitants d’ ses supôrtèrs n’ ârît nén plu crwêre a çoula sérieûzmint. Et pourtant, on î arive tout douçmint.
Au cominchmint del séson, divant d’ ataquer l’ Grand pris d’ Zolder, i nd aveut gâgni 86. Mins l’ gamin d’ èn ôte tchampion, c’ est a dire Harry (4 côps tchampion du Monde) î crwèyeut deûr come fièr. Et vla qu’ il ariveut a 98 divant d’ ataquer Nameûr. Et djusse après a 99.
En saquants mwès, l’ ome a tout gâgnî èt c’ n’ est nén l’ pôve Kevin Strijbos qu’ î sét fé ène saqwè. Stefan, divant d’ ataquer Nameûr èt d’ yesse tchampion pou l’ dîjième côp, n’ aveut pièrdu qui deûs mantches dissu l’ séson : yène a Zolder èt l’ ôte en Espagne.
- Et ç’ n’ est nén mon les ètrandjêrs avou Tortelli, Ramon, Leak èt ôtès De Dycker, qu’ on trouve ène saquî pou bate no tchampion, savèz!
Si Stefan aveut ene mîyète peû divant d’ ènd aler a Nameûr, c’ est pace qui c’ est in malaudjî circwuit. Mins l’ ome ès rafîyeut di discrotchî l’ tite divant l’ public di Bèljique, çu qu’ i n’ aveut jamés rèyussi di dvant, èyèt çoula 16 anéyes après Eric Geboers. C’ est in vré cadau pou s’ dérène séson. Gn a d’ ayeûrs yeû ène grande fiesse adon qu’ èl coûsse a stî finîye.
- Mins dji n’ i esteu nén. Pourtant, dj’ é plu-z awè ène foto da Stefan dissu s’ moto. Et dédicasséye, cobén !
Èç séson ci, on wèt qu’ èl Limbourdjwès rèyussit, non seûlmint a gâgnî, mins ètou a skèter lès mèyeûs timps aus essais. Il est souvint l’ pus rapide avou les rcôrds au toûr èt bén ètindu, i passe souvint èl pus clér d’ ès timps al tiesse del coûsse.
Pou ndè rvènu au circwit del Citadèle, qui ça fuche so les pisses ou so les grand-routes, i gn a ttossi bén del tére, dès pavès, du Macadam ou du bèton. I faut toudi yesse concentrè èyèt ène pètite èreûr divént ttossi râde in gros problème.
- C’ est çu qui m’ plét d’ ènd aler djusqu’ a Nameûr. C’ esteut l’ trwèsième anéye di chûte !
Pou ndè rvènu a Everts, est ç’ qui vos savèz qu’ i gn a saquantès anéyes, il a minme poussè a gâgni trwès Grands Pris su l’ minme djoû, yin dins chaque cylindréye. Etou èl Coupe du Monde d’ enduro dissu lès fôrtès tchaleûs du Brésil. Et pourtant, i discouvreut ç’ dicipline la.
L’ ome a fini pa l’ gâgnî, ès cintième. Co myeû, il a fini s’ carîyère pa ène victwêre : au grand pris d’ France, èl 16 di sètembe. Avou çtèle-la, i gn aveut don cint èt yène victwêres a s’ palmaresse bén rimpli. In scôre qu’ i fra malaudjî bate.
escrît el 11 d’ octôbe 2006; gn a ki kékes pitites faflotes k' ont stî rcandjeyes eneviè l' mwaisse tecse