LES GUERNOUYES QUI VOUL’NU IN ROÉ.
Lés Guernôuyes trop biesses ess’lassint,
D’bin viqui dain leû République,
In bréyant au bon Diœu r’clamînt :
I leû z’evoye in Roé ! comme lés autes, même boutique :
C’estét n’grosse soke dé bot,
Dain l’rii qui chai d’asto !
Trop simpes, comme on za peû, d’iun dit : grand personnâche,
Elles s’évont s’ermuchi dain leû trau d’aérache !
Elles n’ousint né woéti d tout prét,
L’grosse soke qu’elles perdint pou leû Roé !
Rin qu’a l’woéti elle d’ont d’ja l’vesse ;
A l’fin nia ieune qui vude dé s’trau,
Lés autes chuve nu…… Mai qué tableau !
Comme i n’bouge né, elles sautelle nu su s’tiesse !
Lés zév’la su lés spalles, su l’pance, su l’dos du Roé,
Qui lés leye fai et qui s’tint coé !
L’bon Diœu d’a bin rade ieu sti lasse :
« Boutét in Roé, d’sint elles, qui s’boût’che in fiant n’grimasse. »
Il évoye in n’Héron avét s’bétche bin rugi !
Qui lés s’arquelle, lés gope, ét lés s’tranne â plaigi !
Ça n’leu d’allét q’tout jusse ! elles commince nu a brére.
— « L’bon Diœu leû dit : woétét d’vo tére !
« Pouquoé n’avez né t’nu vo p’tit gouvernémint ?
« Sain vouloé vire in Roé, pou sayi du cangemint,
« Fallet l’téni ainsi ét plainte vô n’avisance,
« Quand l’preumi q’vô z’avi ai biesse à l’aune dé France !
« In Roé c’est s’tin ôsti, què vô n’conn’chi né co !
« I vaut miœu qui n’dise rin, qui n’bout’che né comme ell’blot.
« À m’nouye, tenét c’tici, t’é qu’il est, sain rin dire,
« Si j’vo d’évoye co iun, i s’ra p’tétte copu pire. »
Woé, c’faufe ci mes z’effants, n’a né dangi d’morâle,
On voét tout d’chutte su q’vaut, toute ell’puissance Roéyâle.