L’LEU TOURNET À BIERGI.
In Leu chessi, pourchû, pattavau tous lés bots,
N’estrannét pu brammin d’Bédots !
In bia joû dain s’tiesse il invinte,
In plan pou spaurgni s’pia, eiét pou rimpli s’vinte :
I s’habie à Biergî avét n’vesse dé pilou,
Enne barette su s’noraye, ét n’maronne dé toèle griche,
Dés spèts solés, enne bleuse chimiche,
Pou s’n’houlette in baston, avét n’boûrlotte au d’bout.
A’s’dos i pind n’pétite trompette,
Sain roublii d’printe enne malette.
Su s’barette îl aurét bin scrî :
Pou lés Bédots, c’est mi l’biergî !
Gustin, leu vrai Biergi, estét stindu à terre,
In train d’petté s’plangére,
S’gros chin Picard, ronflét comme in soyeux,
Et lés Bedots fieint comme ieuses deux !
L’Leu pou lés fai chaire dain s’n’atrappe,
Coèt qui n’risque rin d’lés z’appélé pa s’voéx,
In l’fiant l’pu tenne qui pou, i pîle et pu il happe,
I pousse dés zurlemins, tout d’in coup s’ain l’savoèt !
Met tout cû d’su cû d’zous, rin d’aute qu’in d’ouvrant s’boutche !
Lés Bédots, l’chin, l’Biergi, sont rade su pid su foutche.
Infardélét, coum’lét, brouyi dain s’n’habiemint,
I n’sai né foute ell’camp, ni r’darré in coup d’dint !
Ell’chin s’aclappe à s’gaye, et l’Biergi prin s’n’houlette,
Li stiche ell’fier dain s’vinte, brige ell’manche sû s’nanette,
Quoé que q’ça est s’tarrivét intrèt Mons ét l’Pintecotte,
D’sét q’c’est s’tenne rutte lesson, pou lès sots et lés sottes,
Pou lés geins qui fiont l’fier, pasqu’il ont in habit,
Qui passe nu pou n’saquoé ét pou avoé d’l’esprit !
Stiche nu leû néz dain tout ét d’iesse adoét ont l’aire,
Tout l’sécret d’leû n’esprit : c’est d’fai l’môrt et dé s’tére !
Tint qui n’chouffelle nu mot, i passe nu pou malins,
Mai si d’rouve nu leu trappe, c’est s’t’arvoère lés voésins.