L’LION EIÉT L’BOURDON.
« Vasé, p’tit prope à rin ! Pau cût, ptit mâle d’agasse
C’est s’tainsi qu’in Lion,
Parlét in jou à in bourdon.
Qui s’foutét d’li in spochant ses agasses !
In d’sant : « Pinse-tu q’j’ai peû du roé des animaux ?
« C’est q’jé m’fout d’ti à pids à ch’faux !
« Woète ell Bou, qu’est s’t’enne biesse
« Brammin pu spesse qué ti,
« Bin j’vo l’toune à bourique ! eiét j’vo li tint tiesse !
« Né tant d’contes, dé t’rossi, jé vourèt bin woigi.
« T’taussi rade su s’queuwi i chai comme-enne balotte !
Avet s’picot v’la no bourdon,
Qui l’pierce, qui l’sangne, et qui l’picotte !
Ét l’Lion beule si bin, qu’on s’muche dain l’zinvîrons !
L’aute ess’déspéche habie,
À l’liasticotté s’queuwe, s’fessart eiét s’croûpion !
Pu s’estiche au fond dé s’mouzon ;
S’picot d’allét comme enne éwie !
Pan ! l’Lion s’tappe à terre ! i s’desbat, n’in pou pu !
Avèt ses dints, ses grawes, i s’agne et i s’arrache !
I sangne pattavau s’pia ! i traite ell’ bourdon d’lache !
Mai l’aute rièt comme in bossu !
S’cumant, mafflet, rindu l’Lion chai roét à terre,
Pattavau tout l’payi, l’bourdon chante ess’victoère !
I chai dain n’toéle d’aragne, in d’allant comme in sot,
I piet là s’vie, ess’blaque, eiét s’picot.
Ça mousse brammin du vrai, si c’n’est né l’pu lonque faufe !
Ça convint à t’tértous ! si bin au rit’che qu’au paufe :
Si vos avet d’zinnemis, choésisset bin vos geins,
Méfiet-vous des pu p’tits, pa l’taye ét les moéyins !
Les draps d’lit bon marchi, c’est toudi les pu rètches,
Les feumes qui crie nu l’pu, c’est souvint lés pu sètches !
In p’tit chin pu qu’in grand, vout toudi aboéyi,
L’grand véra vo r’léchî, et l’pétit vo zagni !
Pou d’allé co pu long woétet co dain les puces :
Enne grosse ronfe dain l’pania ! enne sétche agne et vo suce !
Souvint les parvénus, s’moussent nu lés pu hargneux,
Les sots s’coéye nu malins, l’mau nourri d’vint narreux !
In homme qui n’connait rin, vo stourdi pa s’vintrie,
In p’tit pétron d’Bourgeoés, s’coét n’saquoé toute ess’vie !
On pou fai l’tour du monde, et l’guerre sain rin avoét,
Comme on pou s’casser l’cou, in chéyant d’in baudet.