AZOR EIÉT PICARD DU GRAND MONARQUE.
In coup Azor, enne chinne dé Chaléroét,
Estét pleine et n’avet pont d’plasse,
Pou s’desbarassi dé s’paquet !
Et s’moèse l’avet chessi su l’rûe fauce qui d’ai lasse !
L’paufe chinne suctèt dain tous les coins,
Avet ses jônnes, presse à chaire su l’chémôin !
Elle s’èva vire Picard du Grand-Monarque tout d’chutte,
Po avoé â presté s’cahiutte !
Là qui li presse ; elle fai cinque jônnes, tout d’allét bin !
Là d’sû Picard er’vint :
Azor li d’minde co pou n’quinzenne,
Pou sérmette dé sés poènes !
« Més jônnes, distelle, enne vont né co tout seû ;
Picard li presse co pou n’samoène ou deux.
À la fin i r’vint, co pou ravoét s’cabane :
Mai Azor lia moustrét ses dints !
« Woétét, disti, jè vo trawe vo bazanne,
« Si vos avét l’malheûre, dé foute vo mouzon d’dain !
« Si vo v’let ravoé vo barraque,
« Chéyét nous su l’casaque !
« Woétét d’no foute à l’huche, rade pa l’empoègne du cu !
Mai l’paufe Picard estét strindu !
Les jônnes d’Azor estint spét comme des vias,
S’il avet sti tou seû asprouvé leu machoére,
In pierdant s’trau, il auret co l’lii s’pia,
Et pour li l’pu foutant d’l’histoére.
« Féyét du bin à in vilain,
« I vo chîra dain vo moin. »