L’BAUDÉT KERCHI DÉ S’PONGES EIÉT L’BAUDÉT KERCHI D’SÉ.
In baud’li, s’n’escorie dain s’moin,
Moinnet deux baudets su l’chémoîn,
L’preumi kerchi desponges, d’allet comme in fœu d’paye !
L’aute kerchi d’sé, s’féyét sat’chi l’oraye,
I d’avet s’ketche ! comme no d’sons l’pu souvin.
Les zév’la d’lé in Rii ! faut passé outte dé l’roye !
L’baud’li grippe su l’baudet kerchi avet les sponges,
In choufflant, su s’dos i s’berlonge,
L’sin avet l’sé, pa d’vant, d’allet leu moustré l’voye !
Dain leuwe i voët l’coup d’tins, i s’leye chaire dain in trau !
Tout s’sé fond comme in bouquet d’bure !
R’vint au d’zeu, pette à gaye, deskerchi comme i faut.
Mai l’aute baudet bin fel vout l’chure !
Dain l’trau les zév’la tous les toës :
L’baud’li, les sponges, eiét l’baudet !
Eièt ostant iun q’laute on boét.
Lés sponges devenne nu p’santes l’baudet s’desbat, pestelle,
I fai les cumulets d’in péchon dain n’payelle !
Mai pont d’affaire, i va noyi !
I va à fond eiét i puge,
L’paufe baud’li pou scapper, a co bin ieu des ruges !
Pou l’baudet imbitieux, ça sti bon aployi.
Dain c’monde-ci, si no v’lons fai tertous iun comme l’aute,
Souvint nos estons l’bœuf, et c’est bin pa no faute.