IN DUÉLE A BOÊRE AU PU !
Léon in jou d’sét à Louis :
« Vo d’vét bin in vouloé, à vo pa, à vo mame !
« Enne pinte dé bire pour vous, c’est d’quoé bin vo rimpli ;
Ét l’moinse pétite goutte dé skidame,
Qu’in gârçon vèrét vo chiervi,
Vo frét rinde à s’quetter vo vinte !
« Et ça tins qué m’vessie, copu l’auche qu’in tonia,
« Non contenne dé s’rimpli, dé ch’nique, ou d’ratafia,
« Pout stranner copu d’cinquante pintes ! —
« Tout grawe dain vo goyi ! tout m’chenne comme du lachat !
« Si vo v’ni avét mi, boère tins zin-tins n’potée,
« Qué j’vô z’avalle dé n’seûle hoûfée !
« J’vo frét bin boêre comme ell’ rouchat !
« J’vo z’apperdrét in fiant m’tournée :
« Mai vo dallét, au pu souvint,
« Tout seû, boère in d’mi verre, dain l’fond d’in sâle bouzin ;
« Les moèses dé cabaréts n’s’ront né vôs camarades !
— « Vô gesses, disti Louis, s’ercrestant copu rade,
« Venne nu p’tette d’in bon keure, mai m’fi n’uchét né peû,
« Les gouttes fiont moinse sûr mi q’su vô s’toumaque !
« Jé r’naude ét j’é n’chai né ! Vô stét p’tette bin hûreû,
« D’in r’locter jusqu’a s’teure, quinze dédain vo casaque
« Sain chaîre d’zous l’tâbe sû vo prussien !
« Mai rattindons n’miette ! v’là ti né qué l’gamin,
Du d’bout du cabarét appôte su enne assiette,
Du vrai cognac mîs in perce tout nouvia,
L’pu foire qu’on z’a p’tette ieu, à l’caufe dain in tonia !
Léon tint bon ! mais Louis pette !
On rimplit les tournées ! v’la Louis qu’a l’licotte !
On fait v’ni toés gouttes dé skidame !
Pu cînque tournées dé bonékame !
Léon commincét d’ja à r’satchi ses culottes !
Louis fait vudi l’verre à fond !
Et fait si bin qui rind môrsif,
L’sin qui li moustrét n’pance, t’taussi l’auche qu’in bondif,
Mai qu’avét sés deux pids, comme deux ruques dé sauvlon.