L’CHAT EIÉT L’GUERLOT.
Dain nô guergnî niavét in chat,
Q’nô z’avint surlommét Minette,
Qui v’lét stranner s’qu’au derrin rat,
A pu d’iun il avét, pârlét a leu barette !
Lés rats d’avint leû soû !
Fauce qu’il avint peû du maroû !
I n’mingint qu’a mitant ! setches comme des antomies !
In joû qué l’chat, marcaudét s’bonne amie,
Les rats tertous échenne, voule nu fai in complot,
Pou woéti dê s’d’esfai d’minette,
Et li foute ça à s’guette !
In rat bridét leu cheffe, leu mousse au preûmi mot :
« Qu’on doét autou dé s’cou, aloyi in guérlot,
« Ainsi qu’on l’lintindrét, quand i frét co s’tournée !
« Pou rade petter a gayes, tertous dain leu trawées.
C’plan là estet l’pu bia,
Pou leu spaurgni leu pia !
L’grand chin c’estet-d’allé avet n’ficelle,
A s’cou loyï l’guerlot !
Iun d’set : mi, né si sot !
L’aute ess’muchet, peu qu’on n’l’appelle !
In toésiéme n’ouset né approchi dé s’machelle !
Il ont l’lii tout seû l’rat bridet,
In r’muchant dain leu trau, avet rin d’décidet.
C’faufe ci convéret bin poû l’conseye dé l’régence,
Ousqu’on choési toudi, l’moéyïn qui s’ret l’méyeu,
Mai vire l’homme pou sayï, qui prin l’preûmi l’avance,
V’la l’nœu, disti l’soyeu !