Vos, såvadjès fleurs
Vos, såvadjès fleurs ki dj’ coda :
Sinés, pavoes et flaminetes,
Flaneyes, vos n’ estoz k’ araedjas ;
Souwêyes, vos divnoz tote mannetes.
Walon, dins les lives k’ on vs meta,
Vos ravizez dipus k’ ene miete
Ås såvadjès fleurs ki dj’ coda :
Sinés, pavoes et flaminetes
I vlént k’ po todi on vs wårdaxhe
Dins on waxhea, mo prôpe et nete.[1]
Dji m’ fote di vs awè dzo l’ covra
La k’ bénrade, vos rshonnrîz schåynete
Ås såvadjès fleurs ki dj’ coda.
Sicrît li 17 di fevrî 2014, eplaidî cial so l’ Aberteke, ene miete ricoridjî ciddé.
- ↑ Li powete endè vout al djermêye di waloneu ki djhént ki l’ walon pleut mori, mins k’ i vicreut po todi did pa ses ouves di belès-letes rashiowes dins des lives.