Vos, såvaedjès fleurs
Vos, såvadjès fleûrs ki dj’ coda :
Sinès, pavwès èt flaminètes ;
Flanèyes, vos n’ èstoz k’ arèdjas ;
Souwêyes, vos div’noz tote mannètes.
Walon, dins lès lîves k’ on v’ mèta,
Vos ravizez dipus k’ ène miète
Ås såvadjès fleûrs ki dj’ coda :
Sinès, pavwès èt flaminètes.
I v’lént k’ po todi on v’ wårdahe
Dins on wachê, mo prôpe èt nèt’.
Dji m’ fote di v’s-awè d’zo l’ covra
La k’ bintwèt, vos r’sonn’rîz håynèt’
Ås såvadjès fleûrs ki dj’ coda.