Li tchampion d’ tir å fizik va adlé li ptit Louwis a Mierdo, po vey s’ i n’ åreut nén ene boune lunete po s’ fizik di concours.
Li ptit Louwis n’ esteut nén la et c’ est l’ novea apurdisse ki vént siervi l’ tchampion.
— Dj’ esteu vnou po ene novele lunete po m’ fizik di concours, dit-st i l’ tchampion.
— Abén ! vola djustumint on novia modele k’ on-z a rçû ådjourdu å matén, respond-t i l’ djonne ome.
L’ ome vôreut bén sayî l’ usteye divant d’ l’ atchter et l’ apurdisse lyi dit :
— Veyoz l’ bastimint låvå al copete do tier ? C’ est m’ måjhon. I n a bén troes kilometes. Vos n’ ôz k’ a waitî e l’ lunete, et vos l’ vieroz come s’ ele sereut di l’ ôte costé del voye.
Li tchampion apice li lunete, i waite on moumint et i dit :
— Vos avoz råjhon, on voet tot come si on-z î sereut. Et dji voe minme èn ome ey ene feme tot nous e plantchî.
Li martchand lyi rhape li lunete foû des mwins, tape on côp d’ ouy et dvént blanc moirt. I court avié l’ årmå et prind deus bales e ridant.
— Vola, dit-st i å tchampion, si vos metoz l’ prumîre bale e l’ tiesse di m’ feme et l’ ôte e l’ usteye da l’ ome, vos åroz li lunete po rén !
Li tchampion riprind l’ lunete, il armêye li fizik, i lugne :
— Schoûtez bén, dit-st i å martchand, dji pinsreu bén, k’ avou ene bale, dj’ åreu assez !