Li tchampion d’ tîr å fuzik va ad’lé li p’tit Louwis à Mièrdo, po veûye s’i n’åreût nén eune boune lunète po s’fuzik di concoûrs.
Li p’tit Louwis n’èsteût nén là èt c’èst l’novia apeûrdice qui vint sièrvu l’tchampion.
— D’èsto v’nü po one novèle lünète po m’fizik di concoûrs, disti l’tchampion.
— Oh bé volà djustümint on novia môdèl qu’on-z-a r’çu ôdjoûrdhü ô matén, rèspond-t-i l’djône-ome.
L’ome voureût bén sayî l’ostèye divont d’ l’ach’ter èt l’apeûrdice lî dit, è s’lingadje :
— Vèyoz l’batëmint lôvô al copète dè tièr ? C’èst m’môjo ; i n’a bé trwès këlomètes. Vos n’ôz qu’à wêtî èl lünète, èt vos l’vièroz come s’èl sèrot à l’ôte costé dèl vôye…
Li tchampion apice li lunète, i wête on momint èt i dit :
— Vos avoz rêzon, on vwèt tot come si on-z-î sèrot, èt dji vwè mê.me one ome èt one fème tot nüs è plantchî…
Li martchond li lî r’hape li lunète foû dès mwins, tape on côp d’oûy èt d’vint blon-mwart ; i coûrt avé l’årmå èt prind deûs bales è ridon.
— Volà, disti å tchampion, si vos mètoz l’prumîre bale èl tièsse di m’ fème èt l’ôte è l’ostèye da l’ome, vos ôroz li lünète po rén !
L’tchampion riprind l’lunète, il arméye li fizik, i lîgne… :
— Choûtoz bén, disti å martchond, dji pins’ro bén, qu’avou one bale, dj’ôro assez !