Vola ki li tchvå atrape må ses pates et ki s’ vout coûtchî.
Leyon mousse e ståve :
— Ê, la, valet ! Cwè çki çoula vout dire ?
— Dj’ a må mes pates, dji n’ tén pus so mes djambes, dji n’ mi sai pus rlever…
— Dji m’ va houkî l’ årtisse ; nos voerans bén çou k’ i dirè.
Li vetrinåre arive :
— Dji voe cwè ! Leyon, vola ene drouke ; si dvins troes djoûs, il est co coûtchî, i l’ fårè abate.
Li pourcea, k’ aveut tot oyou, arive dé li tchvå :
— Ass bén etindou, ti does sayî di t’ rilever. Ôtrumint, i t’ vont abate.
— Dj’ a bén trop må ; dji n’ mi såreu rlever.
— Il ont dit troes djoûs ; ti does fé ene foice !
Li deujhinme djoû, li pourcea rivént dé li tchvå :
— Et ké novele ? Todi coûtchî ?
— Dj’ a bén trop må ; dji n’ mi såreu rlever.
— I ont dit « troes djoûs » ; ti does fé ene foice ; ôtrumint, i t’ vont touwer !
Li troejhinme djoû, li pourcea rivént co on côp dé li tchvå :
— Ê ! ké novele ? Todi coûtchî ? Nos estans li troejhinme djoû ! Fwai ene foice, djans !
— Dji vou bén sayî, po t’ fé plaijhi, mais ci n’ est nén åjhey.
— Si ti n’ ti rleves nén, i vont vni po t’ touwer !
Al fén, li tchvå s’ rileve ; a ç’ moumint la, Leyon mousse e ståve et i voet ki li tchvå est so ses pates.
— Miråke ! Miråke ! djoupe-t i. Mareye, Mareye, vinoz abeye ! Li tchvå s’ a rlevé. Nos alans fé fiesse : k’ on towe li pourcea å galop !