Prumîre lète da Paul aus djins d’ Corinte/XI
XI
1. Fioz come mi, et sèyoz come mi, come dji su mi-minme come Christ.
2. Dji vos rmèrcîe di ç’ qui vos vos sovnoz d’ mi po totes sôrtes di raîsons èt qui vos avoz ritnu mès mèssadjes come dji vos lès avoz faît sawè.
3. Portant, dji voûreu qui vos l’ sèpoche : Christ èst l’ maîsse di tos lès-omes ; l’ome èst l’ maîsse dèl feume èt l’ Bon Diè èst l’ maîsse dau Christ.
4. Tot-ome qui dit sès priyéres ou lît dès profécîes li tièsse ricouviète, ni faît nin oneûr à s’ maîsse.
5. Mins tote feume qui dit sès priyéres ou lît dès profécîes à tièsse nouwe, ni faît nin oneûr à s’ maîsse ; c’èst come si èle n’aveut pont di tchfias.
6. Pasqui si one feume n’a pont d’ vwèle, èle n’a qu’a coûper sès tchfias. Oûr, si c’èst mwaîs po one feume d’oyu lès tchfias coûpés ou d’yèsse rasée, èle n’ a qu’a mète on vwèle.
7. L’ome ni dwèt nin mète on vwèle dissus s’ tièsse pousqu'il èst l’imaudje èt l’ glwère dau Bon Diè, adon qui l’ feume èst l’ glwère da l’ome.
8. Ayi, l’ome n’a nin stî satchi dèl feume, mins li feume a stî satchîe di l’ome.
9. Èt l’ome n’a nin stî mètu au monde à cause dèl feume, mins bin li feume à cause di l’ome.
10. Volà poqwè li feume, à cause dès-andjes, li feume dwèt oyu dissus s’ tiesse one preuve dè maîsse qu’èle dipind d’ lu.
11. En minme timps, dins l’ Sègneûr, li feume n’èst nin sins l’ome èt l’ome n’èst nin sins l’ feume.
12. Insi, come li feume a stî satchîe di l’ome, l’ome a vnu au monde pa l’ feume èt tot vint dau Bon Diè.
13. Djujoz-è vos-minmes : èst-c’ come i faut qu’one feume prîe li Bon Diè sins-èsse vwèlée ?
14. Li nature lèye-minme ni dit-èle nin qui c’è-st-onteûs po l’ome d’oyu dès grands tchfias ?
15. Mins, èst-ç' qui c’è-st-one glwère po l’ feume d’ènn’ oyu ? Ayi, sès tchèvias lî ont dné come on vwèle.
16. Si one saquî vout dire li contraîre, nos n’avans nin cite abitude la, ni lès-Èglîjes dau Bon Diè.
17. En fiant ci mèssadje-ci, çu qui dji n’ so nin binauje, c’èst qui vos vos rachonez, nin po yèsse mèyeûs, mins co pîre.
18. D’aboûrd, dj’aprins qui quand vos vos rachonez, vos n’èstoz nin d’acoûrd, çu qui n’ mi sbare nin, d’on costé.
19. I faut bin qu’i-gn-auye ètur vos-ôtes dès bisbrouyes po qui lès cis qui sont convnâbes si rconichèche dins tos vos-ôtes.
20. Adon, quand vos vos rachonez, ci n’èst nin po mougni li soper dau Sègneûr.
21. Pasqui, en mougnant divant lès ôtes, chaque prind si prôpe soper èt onk a fwin èt l’ôte èst soû.
22. N’avoz nin one maujone po mougni èt bware ? Ou mèprîjîz-v' l’Èglîje dau Bon Diè en mèprîjant lès cis qui n’ont rin ? Qui vloz qui dji dîye ? Vos diner dès louwandjes ? Po ça, dji n’ vos-è done pont.
23. Pasqui mi, dj'a rcî dau Sègneûr çu qui dji vos-a transmètu. Li Sègneûr Jésus, li nêt ou ç’ qu’il a stî vindu, a pris dè pwin èt…
24. …après oyu dit mèrci, i l’a coûpé èt a dit : « Çoci èst m’ cwar qui èst por vos ; fioz ça en vos sovnant d’ mi ».
25. Èt après l’ soper, il a pris one coupe èt il a dit : « C’èst li coupe dèl novèle aloyance dins m’ song. Fioz çoci, en vos sovnant d’ mi, chaque côp qui vos-è bwèroz. »
26. Pasqui chaque côp qui vos mougnroz ci pwin-là èt qui vos bwèroz ci coupe-là, vos anonçroz li mwart dau Sègneûr jusqu’à çu qu’i rvègne.
27. Volà poqwè li ci qui mougnrè l’ pwin èt bwèrè l’ coupe dau Sègneûr, en s’è foutant, ci-là sèrè coupâbe aviè li cwar èt l’ song dau Sègneûr.
28. Qui chaque riwaîte dins li et qu’insi i mougne li pwin èt bwèye li coupe.
29. Pasqui, li ci qui mougne èt bwèt sins ricnoche li cwar dau Sègneûr, mougne èt bwèt on djujmint conte li.
30. C’èst po ça qu’i-gn-a dins vos-ôtes bramint dès malades èt dès stroupyis èt qui bramint sont mwarts.
31. Si nos nos djujin′ nos-minmes, nos n’ sèrin′ nin djujés.
32. Mins pa sès djujmints, li Sègneûr nos coridje po qui nos n’ pèrichanche nin avou l’ monde.
33. Insi, mes fréres, quand vos vos rachonez po mougni, ratindoz-vos onk l’ ôte.
34. Si onk a fwin, qu’i mougne è s’ maujone po n’ nin vos rachoner èt assatchi on djujmint sur vos. Dji réguèlrè lès ôtes questions quand dji sèrè arivé.