Prumîre lète da Paul aus djins d’ Corinte/XII
XII
1. Po çu qui èst dès cadaus di l’Èsprit, dji n’ vou nin, Fréres, qui vos soyoche sins l’ sèpe.
2. Vos savoz comint, quand vos-èstîz payins, vos-èstîz assatchis viè dès-idoles moyates.
3. Volà poqwè dji vos l’ di : nuk, si i cause pa l’Èsprit dau Bon Diè, ni dîrè : « Jésus è-st-on-èrètique » èt nuk ni dîrè : « Jésus èst li Sègneûr », si ç’ n’èst pa li Sint-Èsprit.
4. I-gn-a pusieûrs sôrtes di cadaus, mins c’èst li minme èsprit,…
5. …dès sôrtes po aîdî, mins c’èst l’ minme Sègneûr,…
6. …dès sôrtes d’ovradjes, mins c’èst li minme Bon Diè qui eûve por nos.
7. Portant, à chaque, l’ovradje di l’Èsprit èst dinée po tortos.
8. Ayi, à onk èst diné on vèrbiyadje di djintiyèsse, à on-ôte on vèrbiyadje di syince, sûvant li minme Èsprit ;
9. à on-ôte li fwè, pa li minme Èsprit ; à on-ôte dè plu sogni lès malades, pa li minme Èsprit ;
10. à on-ôte dè plu fé dès miraukes, à on-ôte di yèsse profête, à on-ôte dè ricnoche lès-èsprits, à on-ôte dè plu causer pusieûrs lingadjes.
11. On seûl èt minme Èsprit faît tot ça en lès paurtadjant ètur chake come i vout.
12. Bin ayi, pousqui li cwar è-st-ètîr tot en-n-oyant pusieûrs bokèts, èt come tos lès bokèts, minme si i-gn-a brâmint, ni fièt qu’on seûl cwar, insi ènn′ è-st-i dau Christ.
13. Pasqui, c’èst dins on seûl Èsprit, qui nos-ôtes tortos, po fé on seûl cwar, nos-avans rçû li batème, swèt′ Juifs, swèt′ Grecs, swèt′ èsclâves ou libes, èt nos-avans stî noûris d’on seûl Èsprit.
14. Adon, li cwar n’èst nin èmantchi d’on seûl bokèt, mins di brâmint.
15. Minme ki li pî dîreut : « Pasqui dji n’ so nin one mwin, dji n’ so nin dins l’ cwar », il èst dins l’ cwar por ostant.
16. Èt minme si li choûtant dîreut : « pasqui dji n’ so nin on-oûy, dji n’ so nin dins l’cwar », portant, il èst todi ddins.
17. Si tot l’ cwar èsteut on-oûy, w’èst-ç' qu’i sèreut, li choûtant ? Èt s’il èsteut tos choûtants, w’èst-ç' qu’i sèreut l’ nez ?
18. Vraîmint, li Bon Diè a mètu chake bokèt dins l’ cwar come il a vlu.
19. Si tos lès bokèts èstin′ on seûl mimbe, w’èst-ç' qu’i sèreûve, li cwar ?
20. Adon, asteûre, i-gn-a pusieûrs bokèts, mins on seûl cwar.
21. L’oûy ni pout nin dîre à l’ mwin : « dji n’a nin dandjî d' twè » ; ou bin li tièsse dîre au pî : « dji n’a nin dandjî d' twè. »
22. Mins pus rade, lès bokèts dè cwar qui chonèt lès pus flauwes sièrvèt à one saqwè.
23. Èt lès cis qui nos pinsans yèsse lès pus honteûs dè cwar, nos lzî fians oneûr ; insi, nos bokèts lès mwins′ come i faut sont rwaîtîs avou di pus di rwaîtance,…
24. …dismetant qui lès cis qui sont ddja rwaîtîs come i faut n’ènn′ ont nin dandjî. Li Bon Diè a diné pus d’oneûr à çu qui è manqueûve.…
25. …po qu’i-gn-auye pont di séparadje dins l’ cwar, mins qui lès mimbes oyèche sogne onk di l’ôte.
26. Èt si on mimbe sofrit, tos lès mimbes sofrichèt avou li ; si on mimbe èst binauje, tos lès mimbes sont binaujes avou li.
27. Vos-èstoz li cwar dau Christ, èt sès mimbes, chake po s’ paurt.
28. Èt li Bon Diè a bâti si-t-Èglîje, prumîrmint dès Apôtes, deuzinm’mint dès profêtes, trwèsinm’mint dès docteûrs ; après, i-gn-a li cadau dès miraukes, pîs lès cis dè n’ pus sofri, d’aîdî, di yèsse li Rwè, dè causer pusieûrs lingadjes.
29. Tortos sont-i apôtes, profêtes, docteûrs ? Tortos fièt-i dès miraukes ou causèt-i pusieûrs lingadjes ?
30. Tortos ont-i li cadau dè n’ pus lèyi sofri ?
31. Dimandez lès meyeûs cadaus èt dji vos va co mostrer li mèyeûse voûye.