Po-z-èsse on payîsan…
Po-z-èsse on payîsan — payîsan come djèl so —
i fåt-st-avu brakené so lès hautès gonhîres
l’al-nut’, qwand lès singlés dihindèt-st-å galop
vès lès téres, là qu’is v’nèt distèrer lès crompîres.
I fåt-st-aler chake djoû, tchåssî d’ pèsants sabots,
veûyî so ‘ne trope d’åmayes å mitan dès brouyîres ;
avu lès tchifes èt l’ front hålés dès qwate solos
èt, télefèye, dwèrmi ‘ne nut’ å coûr dès sapinîres.
I fåt-èsse côpeû d’ troufe, tèyeû d’ lègne, distriheû,
èt savu k’dûre è mås’, mågré l’ plêve èt l’ houreûs,
ine cope di fwètès bayes atèlêyes à l’èrére.
Èt, si rade qui djulèt’ s’èdwért lôyeminôyemint,
i fåt, sins fé nole hègne, soyî s’ bounî d’ frumint,
tot mouyant di s’ souweûr li bone èt frudjante tére.
Li 12 di May 1919.
« Tåvelês d’Ârdène », Liège, 1923, p. 8
et « Florihåye », Liège, Vaillant-Carmanne, 1925, p. 71.
et « Florihåye », Liège, Vaillant-Carmanne, 1925, p. 71.