O ! vos loûrds tchins di pâtriyotes,
èstîz-v’ è l’ fîve ou n’ vèyîz-v’ gote,
sint Mèdâ v’s-aveût-i troûblés
ou l’ diâle vis-aveût-i soflés,
qwand vos hoûtîz cès sî canayes,
qu’ont l’ cwér poûri djusqu’âs tripayes,
qui, po s’ riploumer, s’aritchi,
ont vindou èt rwiné l’ payis ?
Qui n’avîz-v’ turtos l’ gueûye colêye,
qwand vos brèyîz tote li djoûrnêye :
« Vîve Tchèstrèt, Lassince èt Fâbri,
Cologne, Bassindje èt Dj’han l’ banslî ! »
Vos-ârîz bin mîs fêt dè brêre
qui l’ diâle lès hièrtchahe èn-infiêr,
qu’avou sès grifes è trô d’ leû cou
i fihe moussî dè plonk fondou !
Lès-arèdjîs, avou leû pâye,
qu’i loumèt d’ Fèhe èt qui l’ diâle âye,
cisse pâye qui, dispôy deûs′ treûs-ans,
fêt sètchi lès p’tits èt lès grands,
cisse pâye qui dji lome on tchinis′,
di chagrin m’a fêt v’ni l’ djènisse !
I promètît, lès mâ-sêves tchins,
qui tot-à-fêt sèreût po rin,
Qu’on r’nak’reût so l’ tchâpinne èt l’ ros′,
qu’on n’ magn’reût pus qu’ dè souke à l’ loce,
qu’on mètreût djus tos lès-impôts,
qu’on sèreût qwite di s’ casser l’ cô,
qui ci n’ sèreût qu’ djôye èt liyèsse,
qui tos lès djoûs sèrît dès fièsses…
Mins dispôy qu’i nos-ont r’nov’lés,
on-z-èst dî fèyes pus-afamés !
Divant çoula, dj’aveû dè l’ bîre,
dè pan, dè lârd èt dès crompîres ;
dji vikéve assez onêt’mint
à pwèrter dès sètch so mès rins ;
dj’aléve tos lès djoûs à l’ taviène
beûre ine qwâte avou nosse Djihène.
Mins dispôy qu’i nos-ont r’bat’hîs,
â pône a-dje dè pan à magnî.
Mi fème a vindou totes sès cotes :
èle n’a pus qu’ deûs ou treûs clicotes ;
mi djustâcôr è-st-â lombârd,
èt dji préveû qu’on pô pus târd,
i m’ fârè-t-aler so l’ viyèdje
briber, fé dès honteûs mèssèdjes,
po ramèh’ner quéques briquèts d’ pan
po noûri m’ fème èt mès-èfants.
Çou qu’èst l’ pés d’ tot, c’èst qu’â botique,
vos n’ârîz nin crédit po ’ne figue.
Tot l’ monde djèmih, tot l’ monde si plint,
nosse vèye èst pés qu’â monumint…
On n’a pus ni plêzir ni djôye,
on n’ wèse sofler avâ lès vôyes,
on-z-èst pinsif, trisse èt pèneûs,
on n’ veût qu’ dès visèdjes pâles èt bleûs.
On sohête qui cès-âmes dannêyes,
totès sîh’ à tchinne atèlêyes,
seûyèsse hièrtchêyes è nosse martchî
po avu leûs-ohês k’frohîs.
Dji n’ di rin, mins qui l’ diâle mi bate,
si dji n’ vindéve mès deûs savates
po beûre on bon côp à l’ santé
dè bouria qui l’s-âreût stronnés.
Alez, tos vos gueûs d’ pâtriyotes,
qui l’ diâle vis d’hite èt qu’i v’ dicrote !
On djoû vêrè qui v’ pây’rez bin
di nos-avu d’né tant d’ chagrin.
Vos volîz haper l’ârdjint’rèye
di Sint-Lambèrt èt d’ tote li vèye :
nos v’ vièrans, on djoû, dèl tonîre
frohîs, ou broûlés d’ l’aloumîre !