So l’été abandenée, drî lès p’tits manèdjes,
lu vi tiyoû k’heût su d’housselé cohelèdje
èt fêt ploûre dès fleûrs so l′ niyetée d’èfants
qui djowèt voci dès djeûs du d’vant-an,
dès djeûs inocints quu noulu n’èssègne
(à mons quu ç’ seûye l’âbe lu-méme qui l’s-acsègne),
quu n’ avans djowé, tant d’ fîes, vos èt mi,
quu n’ avans roûvyî… mês qu’ l’âbe a duteni.
So l’ête abandenée, drî lès p’tits manèdjes,
lu vi tiyoû k’heût su d’housselé cohelèdje
là qu’on raskignoûl tchante à plin gosî
duzeû lèye èt lu… qu’one bâhe pwate â cî.
O l’ même aneûtie si doûce qu’one carèsse,
dju v’ pri l’ prumi fîe, d’zos l’âbe, è mes brès’;
nos deûs coûrs boûsît d’ sièrmints qu’ nos v’lîs t’ni,
quu n’s-avans roûvyî… mês qu’ l’âbe a duteni.
So l’ête abandenée, drî lès p’tits manèdjes,
lu vi tiyoû k’heût su d’housselé cohelèdje
èt s’èfonce o l′ tère, là qu’ lès vîs r’pwasèt,
dès rècènes fines blankes qui lès rabrèssèt.
Tos zèls ont stu djônes, — qui sont û rèvôye, —
ont avou d’zos l’âbe dès sondjes tèhîs d’ djôyes…
I nn-a si lontins qu’on n’ s’è pout soveni,
mês, cès djôyes roûvyîes, l’âbe lès-a duteni.
So l’ ête abandenée, dri lès p’tits manèdjes,
lu vi tiyoû k’heût su d’housselé cohelèdje
duzeû l’ tère bènie, poûssîre dès d’vantrins,
qui nos vèya crèhe, asteûre nos ratind…
L’âbe, on djoûr, pûherè l’amoûr du nosse coûr
po ‘nnè fé dès fleûrs quu sès cohes front ploûre
so dès-ôtes-èfants, so lès copes à v’ni,
tot rud’hant m’ tchanson… qu’il ârè duteni.
Eplaideye aprume e l' Lu Vî Sprâwe, Måmdiy, moes d' may 1928; ratournaedje e francès dins l' Antolodjeye Piron (trovåve cial p. 364-365).