XXIII. On sètche lès pans
Èt dispôy ine grosse eûre qui l' fornêye è-st-è fôr
la qui l' tcholeûr faît s' fwèce, li feume tûze mågré lèy,
tot loukant toûrner lès-awèyes,
ås pans qu'èlle a prusti. « Si jamåy i r'toumît!
s'is-alît-èsse broûlés! » Ossu, qwand l'eûre èst v'nowe,
èle si sint 'ne hisse so l'cwér, qu'èle ni såreût maîstri ;
la èt c'est tot sintant tocter s' coûr
qu'èle tape å lådje li pwète di fiér…
Rade èle si clintche po d'ner s' côp d'oûy,
èt, dismètant qu'ine bone hinêye
di novê pan v's-èl hape å nez,
on veût candjî l'air di s' visèdje.
Quéle aweûr! i sont-st-a sohaît !
I n'ont gote ritoumé : sûr qu'i sont come ine plome !
Hay ! li forneûre !
Èt l' prumî pan
qu'èlle assètche foû,
mosteûre å djoû
s' crosse tote dorêye
qui faît r'pinser
å bê tchamp d' blé
qu'è plein d' l'osté
l' solo maw'rih.
Tote li mohone è-st-acorowe ;
et lès pans tot chauds, tot bolants,
s'ètèssèt d'vins lès blankès banses,
après qu'on l's-a bin dispoûss'lé.
Pwis, so l' timps qui l' mère plinte d'èhowe
ritchèdje li for po l' cûte qui vint,
lès-èfants, tot firs di leû tchèdje,
pwèrtèt l' fornêye èl plèce di pire,
la qui l' novê pan va rassîr.