mosteûre å djoû
s' crosse tote dorêye
qui faît r'pinser
å bê tchamp d' blé
qu'è plein d' l'osté
l' solo maw'rih.
Tote li mohone è-st-acorowe ;
et lès pans tot chauds, tot bolants,
s'ètèssèt d'vins lès blankès banses,
après qu'on l's-a bin dispoûss'lé.
Pwis, so l' timps qui l' mère plinte d'èhowe
ritchèdje li for po l' cûte qui vint,
lès-èfants, tot firs di leû tchèdje,
pwèrtèt l' fornêye èl plèce di pire,
la qui l' novê pan va rassîr.
XXIV. Al tåve
Li nut' est v'nowe ; on vint d'èsprinde li lampe
èl plèce la wice qu'on s'tint èt, sol vîle tåve di tchinne,
on-z-a drèssî tot po l' soper.
Èmé lès tasses a fleûrs, li bê pan tot doré
hågne sès blankès båyeûres, qui mètèt l'êwe al boke
ås p'tits-èfants qui djêrèt d'ssus.
Ossu, c'è-st-in-ovrèdje di lès voleur maîstri !
Qwantes fèyes li mère deût-èle man'cî lès ptitès mains
qui s' sititchèt po l' agrawî !
Mins, tot d'on côp, vola qu'on-z-ôt
sol coûr on grand brut d'atèlêye,
qu'èlzî vint fé candjî d'îdèye,
ca vo-lès-la turtos so l' soû :
C'est l' pére! — Rade, i fåt qu'on s'aglidje!
Li feume prind l'pan, faît 'ne creûs sol crosse
avou l' coûté, come po l' béni ;
èt, dismètant qu'èle côpe ås pèces,
l'ome rinteûre avou sès cårpês,
qui s' kihèrèt po l'aprèpî
Il a trîmé co pés qu' sès dj'vås
il èst nanti, rèné d'ovrèdje
ènnè pout pus, i hawe di faim,
èt c'est d'in-oûy di contint'mint
qu'i veût qu'on-z-a t'nou l'eûrêye prète.
