Rade tot l' monde si mèt' a l'ovrèdje.
Ossu, sol coûr, di l'ouh dèl cinse
al cisse dè fôr, c'è-st-ine convôye
di pwèrteûs d' pans qui s'èhåstèt.
Li gamin l's-aboute al crapaude
qui, lèy, lès done al vile måma,
èt l' convôye lès monne disqu'al mére,
qui lès r'çût sol forneûre.
Èt, d'zos l' vôsseûre tchåfêye a blanc,
å mitant d'ine tcholeûr d'infér,
qui d' bin lon v' hatih li visèdje,
li forneûre èmonne li bê pan
qu'èle heût so l' pavé tot rim'nant.
Èt, come ine volêye di colons
qui s' lèyèt tourner so l' hapå
po r'moussî d'vins leû colèbîre,
lès pans s' vont rapoûler so l' tchaud pavé dè fôr,
la qui l' feume lès-èssére. Pwis, tot r'horbant l' souweûr
di s' visèdje avou l' cwène di s' vantrin d' teûle hoyowe,
èle rinteûre è s' manèdje, po l'aler r'mète a pont.
XXIII. On sètche lès pans
Èt dispôy ine grosse eûre qui l' fornêye è-st-è fôr
la qui l' tcholeûr faît s' fwèce, li feume tûze mågré lèy,
tot loukant toûrner lès-awèyes,
ås pans qu'èlle a prusti. « Si jamåy i r'toumît!
s'is-alît-èsse broûlés! » Ossu, qwand l'eûre èst v'nowe,
èle si sint 'ne hisse so l'cwér, qu'èle ni såreût maîstri ;
la èt c'est tot sintant tocter s' coûr
qu'èle tape å lådje li pwète di fiér…
Rade èle si clintche po d'ner s' côp d'oûy,
èt, dismètant qu'ine bone hinêye
di novê pan v's-èl hape å nez,
on veût candjî l'air di s' visèdje.
Quéle aweûr! i sont-st-a sohaît !
I n'ont gote ritoumé : sûr qu'i sont come ine plome !
Hay ! li forneûre !
Èt l' prumî pan
qu'èlle assètche foû,
