D’ après l’ lédjinde, la ki l’ dju Dzeûs′ aveût candjî li rwè dès Arcâdyins (Licawon) è leû pask' i lî aveût fèt magnî do ragwi di tchâr d’ èfant.
Lès-omes wardint ci trisse sôrt d’ èsse transfôrmés insi.
Dvins nos contrées, c’ èsteût l’ Djâle k’ avéve ci pouvwèr, tofèr a l’afut dès flâwèsses dès-omes.
C’è-st-insi k’ Djan Clôse duvna li tèribe leû-warou dès-Ârdènes.
(prononçaedje come li tecse, avou kékes côpaedjes)
I n a bin lontins, Djan èsteût on solide gayård o tote li fwèce di ses vint-cinq ans. I hantéve avou one djône crapôte d’ El Noûvèye, viyadje séparé di Cmanstèr′ pa l’ parfond dominne do Grand Bwès.
Ratni a l’ cinse câze di sès ovrèdjes, Djan n’ poléve pus-aler si sovint hanter cisse pitite crapôte. Il aveût hâsse d’ èl rivèy ! Mins èco one fèye ci djoû la, i n’ î areût nin savou aler : onk di sès d’jvâs touma djus d’ pates. I foûri oblidjî d’ aler trouvi li rbouteû d’ Cièreû.
Todreût, Djan s’ mèta è vôye oute èt oute do bwès. Subitmint, il aporçuva o pazê one fème ki vnéve a s' rèsconte. I crèya ricnoche si crapôte èt cora vè lèye. Mins èle disparècha ol sipècheûr dèl sapinîre.
Djan si dmanda pocwè èle vanéve â djâle, èt s' cora-t-i co pus vite.
So kékes hopes, il esteût djondant d’ lèye. L’apiça po lès hantches, l’ atira vè lu, lî fzant pusieûrs côps s’ fièsse. Cwand, abassoûrdi, i s’ rinda compte ki l’ binète dèl bâcèle èsteût freûde come do mârbe.
A ç' moumint, Djan oya on sclat d’ rîre podrî lu. Rilouca… èt n’ vèya nouk. I si rtoûrna adon so s’ crapôte, mins i n' sèreût pus dvins sès brèsses k’ on fagot d’ djunièsses.
D’ arèdjîsté, i tapa l’ busket â djâle (c’ èst l’ cas du l’ dîre). Pask’ i s' rinda compte ki mèssîre Satan ènn’ aveut profité po l’ atèler.
Djan Clôse divna leû-warou. C’ è-st-a dîre ki, so cmande di Satan, i moweût è djâle po djower des mâvas toûrs azès djins.
Li pôve fouri condâné a cisse malédiccion des longuès-annèyes å long, sins èsse ricnochou so ç’ tins la.
Binvite, on pinsa ki Clôse fizéve dès macralrèyes. Lès djins l’ èvitint. Minme si crapôte finit pa l’ cwiter po s’ fé prinde po fème d’ on djône valèt dèl Vîsâm.
Djan vola s’ vindjî mins n’ î parvina nin. Portant, il divneût fwèrt sûti cwand i s’ ritroveût a cwates pates. Mây nouk ni l’ a acsût do tins k' il atakeût lès viyadjes. Ca one crèyance dit ki si l’ sonk coûrt so l’ pê d’ on leû-warou, i ridvint ûmin.
Arivé â djèrin djoû di si « sèptènat », Djan s’ rafiyeût d’ ènnè vni foû !
Seûlmint ç’ djoû-la, si mame divéve aler al Vîsâm fé dès coûsses. Come èle pinseût ènn’ aveûr brâmint, èle dimanda a s’ fi di vni avou. So l’ tins k’ èle fizéve lès botikes, Djan, s’ pôrminant è viyadje, aporçuva l’ gamin d’ si anciène crapôte ki djowéve divant l’ ouch di s’ mâhon. I sondja adon a s’ vindjî, èt plonca so l’ cârpê ! Li mame, vèyant çoula, brèya : « Dju v’ wâde, mi èfant ! »
Cès paroles fizint sogne a Clôse et l’ arèstint d’ on seûl côp. Èt i rdjonda s’ mére po rprinde li vôye di Cmanstèr′.
A l’ copète d’ one gripète, li vîche, nâhèye, s’ assîya so l’ bwèrd do pazê. Djan, dnant po rèzon d' aler vèy après kékes boleûs, intra è bwès.
So pô d’ tins, on tot gros leû ènnè vna foû, dârant so l’ vîche Clôse ki rtrova on pô d’ fwèce po s’ sâver foû dès tèribès brokes dèl bièsse, tot pitant è s' panse a grands côps d’ pî. Vanée èt l’ vantrin tot hiré, ratinda s’ fi. Cwand il ariva, èle lî conta l’ afaire. Mins lu s' continta d’ rîre ! C’ è-st-adon k’ èle vèya inte sès dints dès bokèts di s’ vantrin !
« Jézus… Mariâ ! » dha-t-èle.
Djan èsteût ricnochou. Li Djâle lî rmèta 7 ans di dpus a èrer è leû.
Foû d’ lu, i s’ ènnè purda a on vî cinsî ki rivnéve d’ aveur sitou stârer l’ ansine so sès wèdes. Mins l’ vî lî mèta on côp d’ fotche inte lès cwèsses. Li sonk suprûtcha èt Djan ridivna ome.
Lès poyous l’ arètint, èt i fouri condâné a èsse broûlé vicant.
C’ èsteût Djan Clôse, li leû-warou di Cmanstèr′.
dit a l' après-nonne di Gouvi pol fiesse ås lingaedjes walons, 27 di setimbe 2015.