Li chaîne, on jou dist-â clajot :
— « Vos avez bin sujet dè plint’ voss’ destinèie :
On rôïetai v’s dirèn’reut si s’ ripoisév’ sor vos.
Li p’tit vint qui passe à l’ rizèie
So l’teûl’ di l’aîw’ qui fait fruzi
Vi forcihe à bahî voss’ tiesse.
Mi, qui jusqu’âx nulèie poit’ li meûn’ comm’ à l’ fiesse
Masquant l’ solo, sâvant l’ ci qu’ m’a chuzi,
Ca l’ pus grand timpès’ mi fait rire.
Tot-à-fait v’s sônl’ pèsant et mi, tot m’ sônl’ lègire.
S’on vs fév’ dè mons crèhe adléz mi,
Vos porî viker sins gèmi :
Ji v’s garantihreu dès orège,
Ainsi qu’ tot âtou d’ mi ji fais po l’ voisinège.
Min bin long d’ là, on v’s tap’ sovint
So tos les sâvag’ boèrd des aîw’ battow’ dè vint.
On veut clérmint qui l’ sôrt vis trait’ comme on pârâce » —
Li clajot responda : « voss’ coûr èst rimpli d’ grâce,
Min voss’ grandeur veut dobb’ : si j’ sos tinr’ à ploï,
J’ heû l’ timpès’ ju d’ mes rin, et vos vos l’ raskoï.
Ci n’est rin d’ess’ halkrosse,
Mi s’krènn ployant-st-â vint court mons d’ dangî qui l’ vosse.
Sét-on çou qui pout v’ni ? I s’ pass’ quéqu’ feie des drôle.
Si v’s avez, dreut comme on piquet,
Sutnou dè vint tot les hiquet,
El fréz-v’s todi ? — » So ciss’ parole,
Qu’esteut surmint l’ ciss’ d’on makrai,
Li nutt’ tom’ d’on plein côp aminant ’n’ dâme-a-bômme
Comme l’infer n’aveut mâïe achessî fou di s’ bômme,
Et qui fat d’ noss pauv’ terre craqué les vîs ohai.
Tot l’ monde si sâv’ po s’ mett’ fou vôïe ;
L’âb’ si tint reud, li clajot plôie ;
Li vint rassônl’ tos ses toubion
Et stâr’ ma foi, d’vins les poussir,
Li ci qu’ di s’ tiess’ jondév li cîr
Et qu’ pinséve out’ dè l’ terr’ fer passer ses talon.