Cwand on vout fé do malén, des côps, on mintixh ene miete. Dji n’ a nén stî foirt oniesse tot cåzant des esprindeus d’ lampes. Dji riskêye do dner ene fåsse idêye di nosse bole ås cis ki nel kinoxhèt nén. Les djins n’ purdèt ki waire di plaece dissu l’ daegn. Si les deus miyårds di djins ki dmanèt sol daegn s’ astamprént ene miete serés, come pou in metingue, i ténrént åjheymint sol plaece d’ ene veye vint miles longue eyet vint miles lådje. On såreut ramonçler l’ umanité etire so on saké iyea do Pacifike.
Come di djusse, les grands n’ vos croeront nén. I pinsèt tni beacôp del plaece. I s’ veyèt ossi grands k’ des bawobapes. Consyîz lzî do fé l’ carcul. I sont sots après les chifes : ça lzî plairè. Mês ni pierdoz nén vosse tins dins des pareyès ratuzreyes. Gn a nole avance. Vos avoz fiyate a mi.
Ça fwait k’ on côp arivé sol Tere, sibaré, li Ptit Prince, di n’ vey nolu ! I cmincive dedja a-z awè sogne, mwints côps k’ i s’ åreut stî brouyî d’ bole, cwand èn anea coleur di lune si choya sol såvlon.
- Boune nute, fijha-t i li Ptit Prince, po vey.
- Boune nute, fijha-t i l’ sierpint.
- So kéne planete est çki dji so tcheyou ? dimanda-t i li Ptit Prince.
- Sol Tere, e l’ Afrike, responda-t i l’ sierpint.
- A ! i gn a nouk dissu l’ Tere ?
- Cial, nos estans e l’ wastene. I gn a nouk divins les wastenes. Li Tere est grande, derit i l’ sierpint.
Li Ptit Prince s’ ashida so ene pire eyet lever ses ouys après l’ cir :
- Dji m’ dimande, endaléve-t i, si les stoeles lujhèt po k’ on djoû, tot l’ monde sepe ritrover l’ sinne. Loukîz m’ planete. Elle est djusse al copete di nos tiesses, et portant elle est lon erî !
- C’ est ene bele bole, derit i l’ sierpint. Cwè vnoz fé avår ci ?
- Dj’ a des rujhes avou ene fleur, derit i li Ptit Prince.
- A ! fijha-t i l’ sierpint.
Et i dmorît sins moti.
- Eyu sont i les djins ? derit i li Ptit Prince po fini. On-z est on pô mierseu, e dzert.
- On-z est mierseu avu les djins eto, derit i l’ sierpint.
Li Ptit Prince el raviza lontins.
- Vos estoz ene drole di biesse, derit i po fini, tene come on doet.
- Mins dji so pus foirt ki l’ doet d’ on rwè.
Li Ptit Prince soriya :
- Vos n’ avoz nén l’ air si stocaesse. Vos n’ avoz ddja pont d’ pate. Vos n’ sårîz ddja voyaedjî.
- Dji vs såreu emoenner pus lon k’ on batea.
I s’ erôla åtoû del tchiveye då Ptit Prince, come on breslet d’ ôr :
- Li ci ki m’ djond, djel rind a l’ årzeye k’ il a moussî foû, derit i. Mins vos, vos estoz peur, eyet vos vnoz d’ ene sitoele.
Li Ptit Prince ni responda rén.
- Dji m’ fwai må d’ vos, vos k’ est si flåwe, so cisse Tere di bleuwe pire. Si on djoû vos årîz l’ tins lon après vosse bole, dji vs aidreu bén. Dji såreu…
- O ! dj’ a foirt bén comprins, fijha-t i li Ptit Prince, mins douvént djåzez tofer avou des advineas ?
- Paski dj’ a totes les risponses, derit i l’ sierpint.
Et i n’ motixhît pus.
Hårdêye difoûtrinne