(prononçaedje eterpayis
mins, pacô, gn a on mot di rcandjî)
Cwand on vout fé do malén, des côps, on mint ene miete. Dji n' a nén stî foirt ognesse tot cåzant des esprindeus d' lampes. Dji riskêye do dner ene fåsse idêye di nosse bole ås cis ki nel kinoxhèt nén. Les djins n' purdèt ki waire di plaece dissu l' daegn. Si les deus miyårds di djins ki dmanèt sol daegn s' astamprént ene miete serés, come po on metingue, i tinrént åjheymint sol plaece d' ene veye vint miles lon eyet vint miles lådje. On såreut ramonçler l' umanité etire so on saké ilea do Pacifike.
Come di djusse, les grands n' vos croeront nén. I pinsèt tni beacôp del plaece. I s' veyèt ossi grands k' des baobabs. Consyîz lzi do fé l' carcul. I sont sots après les chifes: ça lzi plairè. Mins ni pierdoz nén vosse tins dins des pareyès ratuzreyes. Gn a nole avance. Vos avoz fiyate a mi.
Ça fwait k' on côp arivé sol Tere, sibaré, li ptit prince, di n' vey nolu! I cmincive dedja a-z avu sogne, mwints côps k' i s' åreut stî brouyî d' bole, cwand èn anea coleur di lune si schoya sol såvion.
- Boune nute, fijha-t i li ptit prince, po vey.
- Boune nute, fijha-t i l' sierpint.
- So kéne planete est çki dji so tcheyou? dimanda-t i li ptit prince.
- Sol Tere, e l' Afrike, responda-t i l' sierpint.
- Â!! et i gn a nouk dissu l' Tere?
- Chal, nos estans e dézert. I gn a nouk dins les dézerts. Li Tere est grande, derit i l' sierpint.
Li ptit prince s' ashida so ene pire eyet lever ses ouys après l' cir:
- Dji m' dimande, end aléve-t i, si les stoeles lujhèt po k' on djoû, tot l' monde sepe ritrover l' sinne. Loukîz m' planete. Elle est djusse al copete di nos tiesses, et portant come elle est lon erî!
- C' est ene bele bole, derit i l' sierpint. Cwè vnoz vs fé avår ci?
- Dj' a des rujhes avou ene fleur, derit i li ptit prince.
- Â! fijha-t i l' sierpint.
Et i dmorént sins moti.
- Eyu sont i les djins? derit i li ptit prince po fini. On-z est on pô mierseu, e dézert.
- On-z est mierseu avou les djins eto, derit i l' sierpint.
Li ptit prince el raviza lontins.
- Vos estoz ene drole di biesse, derit i po fini, tene come on doet!
- Mins dji so pus foirt ki l' doet d' on rwè.
Li ptit prince soriya:
- Vos n' avoz nén l' air si stocaesse! Vos n' avoz ddja pont d' pate! Vos n' sårîz ddja voyaedjî.
- Dji vs såreu eminer pus lon k' on batea.
I s' erôla åtoû del tchiveye då ptit prince, come on breslet d' ôr:
- Li ci ki m' djond, djel rind a l' årzeye k' il a moussi foû, derit i. Mins vos, vos estoz peur, eyet vos vnoz d' ene sitoele.
Li ptit prince ni responda rén.
- Dji m' fwai må d' vos, vos k' est si fwebe, so cisse Tere di bleuwe pire. Si on djoû vos årîz l' tins lon après vosse bole, dji vs aidreut bén. Dji såreu!
- Ô! dj' a foirt bén compris, fijha-t i li ptit prince, mins douvént djåzez tofer avou des advinias?
- Paski dj' a totes les responses, derit i l' sierpint.
Et i n' motixhént pus.