Et l’ setinme planete, paret, c’ esteut l’ Tere.
Li Tere n’ est nén ene sakêye bole come totes les ôtes ! I gn a drola cint et onze rwès (sins rovyî, come di djusse, les rwès negues), set meyes djeyografes, nouv cint meyes traeyincieus, set miyons et dmey di sôlêyes, troes cint onze miyons di grandiveus, çou ki fwait a pô près deus miyårds di grandès djins.
Por vos aveur ene idêye del grandeur del Tere, dji vs dirè ki, divant k’ on-z edvintaxhe li corant, i faleut etertini, so les shijh continints, ene årmêye di cwate cint swessante-deus meye cénk cint onze esprindeus d’ lampes.
Veyou did lon, c’ esteut foû bea, vårmint. Les mouvmints di ciste årmêye la estént adjinçnés come les cis d’ on balet a l’ operå.
Po cmincî, c’ esteut l’ toû des esprindeus d’ gåz del Nouve Zelande eyet di l’ Ostraleye. On côp leus kénkets aloumés, ces-ci alént coûtchî. Adon, c’ esteut l’ toû d’ åzès esprindeus d’ lampes del Sibereye eyet del Chine, k’ intrént dins l’ cråmignon. Adon, zels eto, i s’ rimuchént dins les coulisses. Pu, c’ esteut l’ toû des esprindeus d’ gåz del Rûsseye et des Indes. Adon, les cis d’ l’ Afrike eyet d’ l’ Urope. Et i gn a måy onk ki s’ brouyive po si intrêye sol sinne. C’ esteut grandissime.
I gn a ki l’ esprindeu del seule lampe do pôle Nôr, eyet s’ copleu del seule lampe do pôle Sud, ki viként come des nawes et des edoirmous : il ovrént deus feyes l’ an.
Hårdêye difoûtrinne