Ça fwait ki dj' a viké tot seu, sins nouk po cåzer avou po do bon, djusk' a vola shijh ans, cwand mi avion touma an rac, ene sawice å mitan do dézert do Sahara. I gn aveut ene sacwè d' sketé dins m' moteur. Eyet come dji n' aveu pont di mecanicyin avou mi, ni di passaedjî, dji m' apresta a sayî, tot fén mierseu, do remantchî mi avion, mågré ki ça n' aléve nén esse åjhey. Po dire li vraiy, c' esteut mi veye ki dji djouwéve: dj' aveu di l' aiwe a boere a hipe po ût djoûs.
Li prumire nute, dji m' a-st edoirmou sol såvion a meye miles di n' impôrte li ké viyaedje. Dj' esteu co pus pierdou k' on nåfradjî a djok so deus bokets d' bwès å fén mitan del Grande Basse. Do côp, vos sintoz come dji fouri sbaré, al pikete do djoû, cwand ene drole di ptite vwès m' dispierta. Ele dijheut:
- S' i vs plait! dessinez-me on bedot!
- Di cwè?
- Dessinez-me on bedot!
Dji zoubla so mes pîs come onk k' åreut stî peté di l' aloumire. Dji frota mes ouys. Dji rwaita comifåt. Et dj' aviza on foû ewaerant ptit boulome, vormint, ki m' ravizéve d' èn air sérieus. I gn a, vaici a costé, li meyeu pôrtrait ki dj' a parvinou a fé d' lu, pus tård. Mins mi imådje, come di djusse, est bråmint moens nozêye ki li vraiy pitit boulome. Mins ça n' est nén mi l' fåte: dj' aveu stî discoraedjî des grandès djins, cwand dj' aveu volou fé do pondeu, ki dj' aveu shijh ans, eyet dji n' aveu rén apris a dessiner, a pus k' des bowas cloyous eyet des bowas å lådje.
Ça fwait k' dji rloukive ciste aparucion la tot rbolant des ouys ewaerés. Ni rovyîz nén ki dj' esteu a meye miles do prumî viyaedje. Mins li ptit boulome, lu, i n' aveut nén l' air pierdou, ni moirt sicrans, ni moirt di fwin, ni moirt di soe, ni moirt di peu.
I n' ravizéve nén di tot èn efant pierdou å fén mitan do dézert, a meye miles do prumî viyaedje. Cwand, po fini, dji parvina a djåzer, dji l' atôcha insi:
- Mins! ki fjhoz avår ci?
Et i m' repeta tot doûçmint, come ça sereut ene sacwè di foirt sérieus:
- S' i vs plait! dessinez-me on bedot!
Cwand c' est k' on-z est trop sbaré på mistere, on n' oizreut ddja rnicter. Si loigne ki ça shonne, a meye miles do prumî viyaedje eyet a deus doets di leyî les hozetes, dji saetcha on fouya et on stilo foû di m' taxhe. Adon, dji m' sovna ki dj' aveu-st aprume situdyî l' djeyografeye, l' istwere, li carcul eyet l' grammaire. On pô mwais, dji deri å ptit boulome ki dji n' saveu dessiner. I responda:
- Gn a rén avou ça. Dessinez-me on bedot.
Come dji n' aveu måy pont dessiné di bedot, dji rfijha por lu ene des deus imådjes ki dj' esteu capåbe do fé. Li cene do bowa k' esteut cloyou. Eyet dji fouri tot peté d' ôre li ptit boulome ki responda:
- Neni! Neni! Dji n' vou nén d' èn elefant dins on bowa. On bowa, c' est foirt dandjureus, eyet èn elefant, ça prind bråmint del plaece. Mi lodjisse est tot ptit. Dj' a mezåjhe d' on bedot. Dessinez-me on bedot.
Ça fwait ki dj' a dessiné.
I rwaita comifåt. Adon:
- Neni, ci la, il a ddja l' air trop malåde. Fijhoz e èn ôte. Dji dessina:
Mi camaeråde soriya djintimint:
- Anfin, vos voeyoz bén! Ça n' est nén on bedot, c' est on berô. Il a des coines! Do côp, dji rfijha mi imådje:
Mins berwete, ça n' li plaijheut nén co:
- Ci la, il est trop vî. Dji vou on bedot ki vicrè lontins.
Adon, come dji pierdeu pacyince eyet ki dj' aveu håsse d' ataker a dismonter m' moteur, dji fjha al vole l' imådje droci.
- Çoula, fijha dju, c' est ene boesse. Li bedot k' vos voloz est dvins.
Mins dji fou tot reyusse do vey ki l' vizaedje di m' djonne djudje esteut tot binåjhe:
- C' est vraimint tot djustumint insi k' djel voleu! Pinsez vs k' i lyi fåt beacôp des yerbeyes, a ç' bedot la?
- Pocwè?
- Paski m' lodjisse est tot ptit!
- A mi idêye, ci serè surmint grand assez. Dji vs a dné on tot ptit bedot.
I clintcha s' tiesse après l' imådje:
- Nén si ptit k' çoula! Tinoz! Vola k' i s' a edoirmou!
C' est insi ki dji fjha cnoxhance avou li ptit prince.
Hårdêye difoûtrinne