I m' fala lontins po comprinde d' eyu çk' i vneut. Li ptit prince mi dmandéve tot plin ds afwaires mins, aparanmint, i n' etindeut måy çou ki dji lyi dmandéve, mi. C' est avou sacwants mots, dits a l' astcheyance, ki dj' a compris ttafwait, pitchote a midjote. Insi, cwand il aviza mi avion pol prumire feye (dji n' dessinrè nén mi avion, ça sereut bråmint trop målåjhey por mi), i m' dimanda:
- K' est çki c' est d' ça po ene sacwè?
- Ça n' est nén ene sacwè. Çoula vole. C' est èn avion. C' est mi avion.
Eyet dj' esteu fir di li dire ki dji voléve. Adon, i derit:
- Kimint! Vos avoz toumé djus do cir, d' abôrd?
- Oyi, deri dju, tot sayant di n' nén fé do rinflé.
- Â! Vola åk di drole!
Eyet li ptit prince riya djolimint, ki dj' end esteu tot måvlé. Dj' inme ostant k' on n' reye nén d' mes rascråwes. Adon, i derit co:
- Ça fwait ki vos eto, vos adschindoz do cir! Di kéne planete estoz?
Sol côp, dji veya come ene pitite aireu, e mistere do ptit prince. Dji li dmanda platezak:
- Ça fwait k' vos vnoz d' ene ôte planete, paret?
Mins i n' responda nén. Si tiesse hossive doûçmint, eyet i rwaitive mi avion:
- C' est l' vraiy k' avou on fayé cayet insi, vos n' sårîz vni di d' foirt lon!
Eyet i s' meta a sondjî et a sondjî, lontins. Adon, i saetcha m' bedot foû di s' taxhe eyet i rawaita eyet ravizer si trézôr.
Vos sintoz bén come çoula m' grabouyive, les sonetes k' i vneut do taper å dfait des «ôtès planetes». Ça fwait k' dji waita do comprinde on pô mî:
- Di d' wice vinoz, mi ptit boket? W' est i «vosse lodjisse»? Eyu çki vos l' contez emoenner, vosse bedot?
I dmora on tins sins moti, a tuziner. Adon, i responda:
- Çou k' i gn a d' bén, avou l' boesse ki vos m' avoz bayî, c' est k' ça li sievrè di måjhon po del nute.
- Oyi ça! Et si vs estoz vayant, dji vs denrè ene coide eto, po l' ateler del djournêye. Eyet co on piket.
Mins la, li ptit prince ava l' air choké:
- L' ateler? Kéne drole d' idêye!
- Mins si vos n' l' atelez nén, il irè tot costé eyet i s' piedrè!
Mi camaeråde si tapa-st a djiper, eco on côp:
- Mins eyu vôrîz k' il ireut?
- Bè, tot l' minme ewou. Tot droet!
Adon, li ptit prince derit, tot sérieus:
- Ça n' fwait rén. Mi lodjisse est si télmint ptit!
Et, ene miete disbåtchî, motoit, i djha co:
- Tot nd alant tot droet, on n' såreut aler foirt lon!
Hårdêye difoûtrinne