(prononçaedje eterpayis
mins, pacô, gn a on mot di rcandjî)
Cwand dj' aveu shijh ans, on côp, dj' a veyou ene foû bele imådje, dins on live so les såvadjes bwès. Li live si loméve «Des istweres ki s' ont passé po do bon». L' imådje mostréve on sierpint bowa ki mougnive ene såvadje biesse. Vochal ene copeye di l' imådje.
Divins l' live, on djheut: «Les sierpints bowas avalèt leu proye tote etire, sins l' mawyî. Adon, i n' savèt pus bodjî eyet i doirmèt shijh moes å lon, li tins do dijerer.»
Do côp, dj' a tuzé eyet ratuzer ås avinteures del djungue et mi eto, dj' a parvinou a fé m' prumire imådje avou on croyon d' coleur. Mi imådje limero 1. Ele ravizéve çouchal:
Dj' a mostré m' tchif d' ouve åzès grandès djins et lzi dmander si mi imådje les fjheut avu pawe.
Ele m' ont respondou: «Douvént åréns ns peu d' on tchapea?»
Mins mi imådje ni rprezintéve nén on tchapea. Ele riprezintéve on sierpint bowa ki dijeréve èn elefant. Adon, dj' a dessiné l' å dvins do sierpint bowa po les grandès djins savu comprinde. I lzi fåt tofer esplikî les pondants et les djondants, les grandès djins. Mi imådje limero 2 esteut insi:
Les grandès djins m' ont consyî do leyî tchaire les dessins di sierpints bowa, k' i soeyexhe å lådje ou cloyous, po studyî pus rade li djeyografeye, l' istwere, li carcul eyet l' grammaire. Ça fwait ki, cwand dj' aveu shijh ans, dj' a leyî toumer l' mestî, minme ki dj' åreu surmint yeu stî on prumî pondeu! Dj' aveu stî discoraedjî paski dj' aveu fwait berwete avou mes imådjes limero 1 eyet limero 2. Les grandès djins ni compurdèt måy rén totes seules, eyet c' est scrandixhant po ls efants, ki dvèt tofer et tofer resplikî totafwait.
Do côp, dj' a dvou tchoezi èn ôte mestî: dj' a-st apris a moenner des avions. Dj' a volé on pô tot avå l' monde. Eyet c' est l' vraiy ki li djeyografeye m' a bråmint siervou: i n' mi faleut k' on côp d' ouy po ricnoxhe li Chine di l' Arizona. I gn a di l' avance, cwand c' est k' on s' a pierdou del nute.
Ça fwait ki dj' a rescontré, tot å lon di m' vicåreye, ene kekeye di sérieusès djins. Dj' a bråmint viké dins les grandès djins. Djels a veyou di d' foirt près. L' idêye ki dj' a d' zeles n' est nén meyeuse po ça.
Cwand dj' endè rescontréve ene k' aveut l' air do vey ene miete pus clair ki ls ôtes, dji purdeu mi imådje limero 1, ki dj' a todi wårdé, et djel sayive sor leye. Dji voleu savu si cisse grande djin la compurdeut les afwaires po do bon. Mins ele mi respondeut a tot côp: «C' est on tchapea». Adon, dji n' divizéve pus di sierpints bowas, ni des såvadjes bwès, ni des stoeles. Dji m' meteu a s' livea. Dji li djåzéve do bridje, do golf, del politike eyet co des crawates.
Et l' grande djin esteut tote continne do hanter ene sakî di si raizonåbe.