Ça fwait ki dj’ a viké tot seu, sins nouk po cåzer avou po do bon, disca vola shijh ans, cwand mi-y avion touma an rak, ene sawice å mitan do dezert do Sâra. I gn avot ene sacwè di sketé dins m’ moteur. Eyet, come dji n’ aveu pont d’ mecanicyin avou mi, ni d’ passaedjî, dji m’ apresta a sayî, tot fén miêrseu, do remantchî mi-y avion, mågré ki ça n’ aléve nén esse åjhey. Po dire li vraiy, c’ esteut mi veye ki dj’ djouwéve: dj’ aveu di l’ aiwe a boere a chipe po yût djoûs.
Li prumire nute, dji m’ a-st edoirmou sol såvion a meye miles di tolminme ké viyaedje. Dj’ esteu co pus pierdou k’ on nåfradjî a djok so deus bokets d’ bwès å fén mitan del Grande Basse. Do côp, vos sintoz come dji fouri sbaré, al pikete do djoû, cwand ene drole di ptite vwès m’ dispierta. Ele dijhët:
- S’ i vs plait ! dessinez m’ on bedot !
- Dicwè ?
- Dessinez m’ on bedot !
Dji zoupla so mes pîs come onk k’ årot stî peté d’ l’ aloumire. Dji frota mes ouys. Dji rwaita comifåt. Et dj’ aviza on foû ewaerant ptit boulome, vårmint, ki m’ ravizéve d’ èn air serieus. I gn a, vaici a costé, li meyeu portrait ki dj’ a parvinou a fé d’ lu, pus tård. Mins mi-y imådje, come di djusse, est bråmint moens nozêye ki li vraiy pitit boulome. Mins ça n’ est nén mi l’ fåte: dj’ aveu stî discoraedjî des grandès djins, cwand dj’ aveu volou fé do pondeu, ki dj’ aveu shijh ans, eyet dji n’ aveu rén aprins a dessiner, apus k’ des bowas cloyous eyet des bowas å lådje.
Ça fwait ki dji rloukive ciste aparucion la tot rbolant des ouys ewaerés. Ni rovyîz nén ki dj’ esteu a meye miles do prumî viyaedje. Mins li ptit boulome, lu, i n’ aveut nin l’ air pierdou, ni moirt sicrans, ni moirt di fwin, ni moirt di soe, ni moirt di peu.
I n’ ravizéve nén di tot èn efant pierdou å fén mitan do dezert, a meye miles do prumî viyaedje. Cwand, po fini, dji parvina a djåzer, dji l’ atôtcha insi:
- Mins ! ki fjhoz avår ci ?
Et i m’ repeta tot doûçmint, come ça sereut ene sacwè di foirt serieus:
- S’ i vs plait ! dessinez m’ on bedot !
Cwand c’ est k’ on-z est trop sbaré på mistere, on n’ oizrët ddja rnigter.
Si loigne ki ça shonne, a meye miles do prumî viyaedje eyet a deus doets di leyî les hozetes, dji saetcha on fouya et on stilo foû di m’ taxhe. Adon, dji m’ sovna ki dj’ aveu-st aprume situdyî l’ djeyografeye, l’ istwere, li carcul eyet l’ grammaire. On pô mwais, dji deri å ptit boulome ki dji n’ saveu dessiner. I responda:
- Gn a rén avou ça. Dessinez m' on bedot.
Come dji n’ aveu måy pont dessiné d' bedot, dji rfijha por lu ene des deus imådjes ki dj’ esteu capåbe do fé. Li cene do bowa k’ esteut cloyou. Eyet dji fouri tot peté d’ ôre li ptit boulome ki responda:
- Neni ! Neni ! Dji n’ vou nén d’ èn olifant dins on bowa. On bowa, c’ est foirt dandjureus, eyet èn olifant, ça prind bråmint del plaece. Mi lodjisse est tot ptit. Dj’ a mezåjhe d’ on bedot. Dessinez m' on bedot.
Ça fwèt ki dj’ a dessiné.
I rwaita comifåt. Adon :
- Neni, ci-la, il a ddja l’ air trop malåde. Fijhoz è èn ôte. Dji dessina:
Mi camaeråde soriya djintimint:
- Infén, vos veyoz bén ! Ci n’ est nin on bedot, c’ est on berå. Il a des coines ! Do côp, dji rfijha mi imådje:
Mins berwete ! ça n’ lyi plaijhot nén co:
- Ci la, il est trop vî. Dji vou on bedot ki vicrè lontins.
Adon, come dji pierdeu pacyince eyet ki dj’ aveu håsse d’ ataker a dismonter m’ moteur, dji fjha al vole l’ imådje droci.
- Çoula, fijha dju, c’ est ene boesse. Li bedot k’ vos vloz, il est dvins.
Mins dji fou tot reyusse do vey ki l’ vizaedje di m’ djonne djudje esteut tot binåjhe:
- C’ est vraiymint tot djustumint insi k’ djel voleu ! Pinsez vs k’ i lyi fåt beacôp des yerbêyes, a ç’ bedot la ?
- Pocwè ?
- Paski m’ lodjisse est tot ptit !
- A mi-y idêye, ci serè surmint grand assez. Dji vs a dné on tot ptit bedot.
I clintcha s’ tiesse après l’ imådje:
- Nin si ptit k’ çoula ! Tinez ! Vola k’ i s’ a-st edoirmou !
C’ est insi ki dji fjha cnoxhance avou li Ptit Prince.
Hårdêye difoûtrinne