L’PIA D’L’OURSE.
Deux gros paoüres, qu’avint dangi d’mannoye,
Pou dé cachi estint évoye.
N’saqui leû conte : qu’in Ourse viquét dain l’bot d’Cheslét,
Dé n’pia comme in fouan, et cra comme toés baudéts !
L’pu franc avét s’fusique, s’fout dain l’tiesse dé l’desquinte !
D’l’escôrchi, d’prinle ess’pia, dé l’tânné et dé l’vinte.
I vont trouvé l’pétit Flamin,
L’marchand d’pia d’lîfes ét d’pia d’lapins !
Dain l’tuyau dé s’noraye, conte nu leû n’avisance !
Toppe nu l’mârchi, ét vinde nu l’pia d’avance :
Niaurét d’quoé s’fai n’casaque, plintiveuse â plaigi,
Et n’casquette, si d’avét dangi.
I vont quai dés balles et dé l’pourre,
On prin l’fusîque, on l’ketche, eiét on l’bourre !
Et lés zé v’la parti dain l’bot.
L’Ourse arrife in groulant ! i strin à leû barette !
Iun plâne su in charnîa, s’racrapotte à l’coupette,
Et l’aute ess’tappe à terre su s’dos !
I fai l’môrt ! pasqué l’Ourse, gloû, narreux et ficelle,
N’mougne né n’saqui, si n’vique et si n’chouffelle !
I r’tint s’nalenne ! l’Ourse vint sucté t’tautou,
I l’lertoune avét s’grawe !
S’atche su s’maronne, li d’esquette et li trawe !
Clappe ess’mouzon à s’nez, à s’cû, eiét à s’cou !
« Né d’ça, disti, jé n’mougne né dé l’charogne,
« Ça donne dés pûs, eiét dés rognes !
« J’ai bin l’doét d’iesse narreux.
« Mougni pourri, r’chauffet ! Bîn j’s’rét bin anoyeux !
« Léyons là ça, arvoère ! »
— I leye là m’n’homme su s’pance, stindu s’visâche au r’vierre.
L’aute desquin dé s’charnia :
« Et bin, disti, quoésqui t’a dit d’nouvia ?
— I m’a dit, disti l’aute : qu’tint qu’l’Ourse n’ai né à terre,
« I n’fallét né dé vinde ell’pia. »
Brammin d’geins dain c’monde ci comince nu enne affaire,
C’est ch’faux, caroches, toélette, boère et mingi tout ferre !
Mai si l’affaire toune mau, on lés voét r’chaire Grôs Jean,
Comme dévant.