L’LION QUI SÉVA A L’GUERRE.
In Lion v’lét d’allé fai n’guerre à tout déstrure !
S’générale et s’minisse, tappint d’asto dain l’plan ;
« Il ai sûre dé gangni ! toutes lés biesses voulint l’chure,
« L’innemi r’tannét n’aurét qu’a foutte ess’camp.
« Sés biesses enn’m’inquint né d’in bouton à leû guette !
« L’zautes n’avint né seûl’mint, enne flotche à leu barette !
— Au Roé qu’on bladde on mousse, tout bia pou cominci,
J’connét în Impéreûre, qu’a sti r’méch’nét ainsi !
Mai l’Lion n’estét né si biesse :
I leû donnèt leû posse, dèspu l’bas s’quau pu-haut :
Lélèfant su s’lauche dos d’vét satchi l’pu fôrte piesse,
Eiét l’Ourse grippé à l’assaut,
Lé R’nau comme in Vanmoque, grabouyî l’plan d’campagne,
Et l’Sinche ingeûsé l’zautes pa sés prautes dé tatlard :
« Révoyet, disti iun, l’Baudét qu’est s’tin boyard,
« Et l’Lieffe qu’a toudi peu, qu’in chin ou l’aute nél’lagne !
— Doucemint, cousin, disti l’Lion,
« Jé lés destins pou m’batayon :
« L’Baudét s’trindra les geins, pa s’voéx comme quinze trompettes,
« Eiét l’Lieffe dira quai més lettes. »
I comperdét miœu l’jœu, q’pu din gouvernémint,
Les geins d’vrint dain l’payi, s’achire ch’qun’un à s’plasse,
Niaurét pont d’prope à rin, pont d’paufe pou tinde ess’moîn,
Moins d’prigeons, d’hôpitâle, où s’qué l’chinaye s’intasse !
Comme dain l’pu haut impoé, on s’mousse fin dain s’mestî,
Ostant qu’in directeûre, respectét in ouvrî,
D’abaure qui fai s’dévoère, eiét qui rimpli s’posse ;
L’sin qui n’vout pu d’ouvrîs, ni pont d’moèses, a minti,
L’plasse est là pou t’tertous ! gangnelle pa vô cabosse :
L’aprinti d’vint bin moèse, l’moèse pou r’chaire aprinti.