L’VINT EIÉT L’SOLIA.
L’Vint in bia joû d’sèt au Solia :
« N’fai né d’tès zimbarras dain tès collés d’chimiche,
« Pasqué les geins disent nu q’tes bia !
« J’vourèt bin qu’avét mi, tu viennes sayi tés sîches.
« D’vant m’fauce, eiét d’vant m’souffe, nîa rin qu’est s’t’al’abri !
« Tout seû j’fai tout mârchi su terre,
« Et j’su copu foire qué l’tonnoêre !
« C’est mi qui fai daller l’vintilateûr Fabri,
« Cest mi quî fai chimté lés grisous dain les fosses,
« C’est mi qui fai chîlé, hûlé lés haut fôurnias,
« C’est mi qui d’su les euwes fai d’allé les batias,
« Et au zéles des moulins, qui leû fai couri l’posse.
« Si nia dés geins, qu’ont bin mingi bin bû,
« Padri, pa d’vant, j’leu fai co fai du brû ! »
— « Tu n’dis né q’c’est in brû, m’wai à vo foute ell’pesse !
« Disti l’Solia, né pu q’lés geins q’tu fai péri !
« Ni d’su leû tiesses, quand tu fout dès ardoésses !
« Ça n’impêche né qué j’su pu foire qué ti !
« Jé n’destru rin, mai j’fai viqui tout l’monde ;
« J’lume et jé r’chauffe les geins et lés biesses n fiant m’ronde.
« Voésse bin c’payisan là, qui séva avet s’via,
« Vousse wagi, qué d’vint ti, j’li frai satchi s’mantia ?
— « Toppons ça, disti l’vint in boursoufflant s’machelle !
T’t’aussi rade i comînce ! tous ses sîches i choufelle !
V’là m’n’homme qui coét qu’on vout, l’liarachi l’pia du dos,
I sat’che ferme su s’mantia, su s’casquette et s’saurot !
L’vint n’sé coét né battu ! i s’radaye, i r’doubelle !
Mai l’payisan tint bon !
S’mantia n’tint pu q’pa in bouton !
Mai peû dé l’piette, i l’loye avét n’ficelle,
Et l’vint qui l’voèt désboutonnét,
R’chouffelle rade comme in déschainnét !
Mai l’payisan prin s’baston et i trotte,
Tins q’dain s’mantia, chaudemint i s’racrapotte.
— « À m’tour disti l’solia, vo fauce passe à costét !
Et v’la qu’au payisan i li pette ess’nanette !
I drouve rade ess’mantia, ét i sat’che ess’casquette.
I suèt dés gouttes comme dés poés !
I pouffét qui déstét tout pâle,
Et l’Solia r’doubelle cô d’ardeûr,
Au point qui fiét n’châleur,
À fai sué lés pids du diâle !
À l’fin no payisan cût, fondu pau Solia,
S’arrette, desfai l’ficelle, et i fout là s’mantia.
« Et bin, disti au Vint, qui s’qu’a gangni asteûre ?
« Vo stèt in petteu d’poés ! d’allét choufflé ailleûre !
Pa l’fauce eiét l’colère, Châles, on n’fai rin, intinse,
On réussit bîn miœu pa l’douceûre et l’patieince.