L’LIÉFE EIÉT L’TORTUE.
Boutons zé co iune su les Lieffes,
Qu’est starrivée dain n’piesse dé treffes :
Enne Tôrtue d’sét in joû, à in Lieffe ; vousse wagi
« Qué j’srai d’vint ti à Mârcinelle ?
— « Ti, disti, tu d’vins sotte ! t’as l’balzin, tu berdelles !
« Ça n’vaut né l’poène dé m’desringi !
— « Sotte ou non, distelle, jé wage co !
— « Si té l’vout toppons ça, disti, allô tout d’chutte !
Et i tappe nu leû liards au pot !
L’tôrtue séva pianne pianne, sain rattinde enn’mînute,
Su l’tins què l’Lieffe riét n’bouchie,
Il avét bin l’tins d’sinte, l’costèt qué l’vint choufflét,
Pour li niavét né cô n’pichie !
Et i s’grawét sain iesse mafflét !
L’Tôrtue boute toudi, eiét l’trotte,
Sain r’tourné s’tiesse, doûcemint l’Bérotte :
L’Lieffe sain s’mette à purette estét sûre dé gangni !
I s’fout n’bosse dain lés triannelles,
Bat s’flemme dain lés zayes à purnelles,
I r’voéte ! pou ravoé l’aute, i n’doét né s’éspaurgni !
I part comme enne balle dé fusique,
I sautelle in fiant dés hauts r’bouts,
Tout ça c’est poène pîerdue ! il est battu ! bernique :
L’Tôrtue d’vint li, arrife au d’bout !
« Bîn, distelle, qué nouvelle ? Woésse bin que j’té couyonne !
« Et quoé fraisse si comme mi t’ai kêrchi dé t’mogeonne ? »
I n’faut né travayî trop taure, ni trop matin,
Pou fai n’saquoé d’bin fai ! mai travayi à tins !
In joû no Pâ, l’Majôr dé l’gârde civique,
P’tette ell’ seû pattavau l’Belgique,
Qui n’ont né décorét !
Ça n’l’aurét né rindu pu adoét dain s’fabrique,
Pu cra, méyeu, miœu vu pa tout costét !
Pasqué leû coéx d’honneûre, c’n’est pu qu’enne vie erlique,
In vî naviâ ! enne vie berlique !
In vî côrdon !
In vî rât’chon !
Et pou l’l’avoét : i n’faut qué l’protection !!
Ça n’a pu d’goère, ça n’a pu d’chique,
On l’l’aclappe su l’carcasse d’iun v’nu rit’che dain s’boutique !
Su in vi caporâle, boyard ! mai fin ch’niqeû !
Su in fiœu d’tour, ou in chânteû !
Qu’ont bin rimpli leu sat’che ! în boutant pou leû goère !
S’il ont sti brafes, i n’ont rin fai q’leû d’voère !
Si bin q’quand nia iun d’décorét,
Les geins d’minde nu pouquoé ??
Mai r’chéyons su nô faufe asteure :
Nô Pâ in joû déviét sept heures,
D’vèt d’allé quai l’convoét
Avét nô frère Louis, qui sokét su s’payasse !
D’viét toès heures, v’la q’nô Pâ vint l’sachi pa l’tignasse,
R’nettii, descoumlét ét rasét !
Mai rin à fai, Louis ronflét fauce qu’il ai lasse.
Nô Pâ li d’sét : « R’leffe tu, tu doirme comme in bérau !
« Ta co rintrét au niu, à l’heûre Michî Gérau !
« Boutche tu ! faut iesse pu lesse !
« L’convoét pettra à gaye, eiét tu n’s’ras né presse !
« Woé ! au niu c’est tous chins courants,
« Et au matin tous chins dôrmants ! »
D’viét chi z’heures, Louis s’leffe, i s’desbarbouye, i s’rasse,
S’trânne in chiquét, eiét n’crasse tasse,
Et dain l’convoét va printe ess’plasse !
Nô Pâ, à toès heures quai su pîd,
D’vant d’pârti roublie in papî,
I cache, i court, ét l’convoét l’léye padri.