L’Mongni, s’Garçon eiét s’Baudet

Èn årtike di Wikisource.
[ 49 ]

L’MONGNI, S’GARÇON EIÉT S’BAUDET.

(Le Meunier, son Fils et l’Âne.)

J’ai intindu conté in joû enne drolle d’histoère,
D’in môngnï qui d’allét, avét s’garçon â l’foêre.
L’és z’èvla parti d’Châlèroèt,
Pou d’allé vinde leû vi Baudét !
Pou li donné belle aire, ét iesse pu sûre dé l’vinde,
I loye nu sès quattes pattes, i comince nu â l’pinde,
Pou l’porté avét în baston,
Comme in curét dain n’procession !
L’preumi qui les rînconte comince à s’foute à rire ;
« Bin dè v’la ieune, disti, c’t’elle lâle, on pou l’lescrire !
« C’est vraimin s’foute dès geins ! mai l’pu biesse dé ieuses toês,
« C’n’est né l’sin qui d’a l’aire ! c’n’est nè toudi l’Baudet !!
« Nô Mongnï comprîn l’jœu ! i desloye rade ess’biesse,
I l’met su pid, prin l’britte, eiét il satche pa l’tîesse.
Ça inragèt l’Baudet qui v’lêt miœu iesse pôrtét !
I comînce à crii, mai l’Mongnï sain foutèt.
I fout s’garçon su s’dos, i chû, et i rinconte,
Toès maquignons qu v’nint, avè dés ch’faux d’ermonte :
« Sacré grand prope à rin ! disti iun au gârçon,
« Tu d’vrét bin iesse honteû d’l’lèyï là chure é’t’pére !
« A l’plasse d’allé à pid, à l’doyette sain fasson !

[ 50 ]

— Allô, dîsti l’Mongnï, nô d’allons vô complére,
S’gârcon dèsquin, et t’taussi roét,
I prin s’plasse, pique dés deux, fel in fiant clachi s’foét !
Né co n’pichie pu long, rinconte toès bauchelles ;
— « Woête in pau, distelle ieune, faut ti iesse fènéant,
« Pou in foire homme ainsi, d’léyi chûre in effant !
« Et ça pou fai dé s’cranne ! su l’voye dé Marcinelle !
— « Ça n’vô r’gâre né jônne fie, et passét rade vo ch’moin,
« Disti l’Mongni ! gare à vous si j’desquin !
Lès bauchelles ess’ joque nu ! mai coéyant fai n’biestrie,
I prin s’garçon padrî, eiét l’zév’là pârti !
I n’avint né co fai n’pichie,
Qu’arrîfe enne binde dé geins qui s’mette nu à crii :
« Dé v’là deux qu’ont bin l’tour, pou kerchi leû bourique !
« O ! i nia rin d’si sûre, i f’ront crèvé leû bique !
« Aringi n’biesse ainsi ! faut îesse in vrai bouria !
« Daujureux qu’à Cheslet, i sévont vinde ess’pia !
— « As’teure, disti l’Mongnï, jé n’sai commint mi printe,
« Pou continté lés geins, s’prouvons in pau d’ésquinte :
— L’paufe Baudèt s’ersoufflét ! I nestint né co long
Qui rinconte nu sû l’voye, l’gros Charlot, leû maçon !
— « Tint, disti, qui voéla ! où d’alléz oh ! vous autes,
« Dalléz vinde vo Baudét ? mai pou vous fai l’chémoin
« Pouquoé n’grippéz né d’sû ? — Vô s’tét dés drolles d’Apôtes,
« Vos usèt vos solés, vos estét sû vos dints,
« Pou spaurgni l’pia, lès poéyes, eièt lés pids d’vo biesse !
« A vo plasse, jé l’pôrtrét dain n’boèsse ?
— Et bin, disti l’Mongni, si j’su biesse jé m’in fout,
« Asteure, cousin Charlot, j’va bouté à m’ n’idée ?
« Qu’on venne dire enne saquoé, ou qu’on n’disse rin du tout ?
— Eiét in t’nant s’parole, il a gangni s’journée.

MORALE.

Choutèt bin mès zeffants : stét porchi, ou studiant ?
Vindét des pias d’lapins, dès chins, ou bin dés gants ?

[ 51 ]

Féyet du poin dèpisse, ou bin dés allumettes,
Vo n’contintrét personne ! On s’foutra d’vous tout nette.