L’GUERNOUYE EIÉT L’RAT.
In joû in Rat, cra comme enne Loutte,
D’lé in fossèt rugêt sès dints,
Enne Guernouye qui l’woétét, cachét tous les moéyins,
Dè l’sat’chi dain lés flous, pou l’noyi ét l’rascoutte !
Tint qu’à l’fin elle li dit : « vins au fond du fossét ;
« Tu viras m’pa et m’mame, mès z’effants et m’mogeonne,
« C’est l’vraî payi d’cocagne ! on rît, on chante, on boèt,
« C’est drolà qu’on s’in r’donne !
« In attindant d’crévé d’plaigi,
« Su l’voye ça t’fras du bin d’nagi,
« Jé t’moustel’rai l’reine dés Guernouyes,
« Qui vo dit l’tins, rin qu’in clappant sés ouyes !
« Trousse tés guettes, desquindons dain l’fond !
— « Oyi mai, disti l’Rat, jé nache comme in chîn d’plon !
— « Bah ! distelle, ell’Guernouye, j’ai moénnét pu d’enne ratte,
« Vins droci q’jé t’aloye à m’patte !
« Avét in jonc commé in scorrion ! »
— Lés zév’la aloyis et v’la l’Guernouye qui s’atche ;
Elle riét d’ja plain s’vinte, dé s’pépii sés ochats !
V’là l’Rat quî pique enne tîesse ! elle le tint peu qui n’lâche ;
I s’desbat comme in Rat, pourchu pa n’binde dé chats !
Et l’Guernouye ell’voét d’ja dain s’satche !
— Du coup vint in Mouquet !
I lés voét s’descoubatte, vlan ! i chai sû l’paquét !
I prind l’Rat dain sés grawes, i voét pinde ell’Guernouye,
— « Deux mouches din coup d’chavatte, disti, no f’rons fristouye !
« Jaurai l’mitant d’l’absolution,
« J’mougn’rai dé l’châre et du péchon. »
Pou foute enne saqui d’dain, souvint l’plan qu’on z’apresse,
Fout d’dain l’sin qui l’la ieu dain s’tiesse,
L’proverbe n’a nè minti et qu’on né l’roublie né :
« C’est q’quand on crache in l’aire, ça vo r’chai su vô néz ! »