L’CHOU CLAUSE EIÉT S’FEUME.
On s’souvint co tertous, du Choû Clause à l’Ville-Basse,
Qu’estét soû d’lundi à sem’di !
I brichaudét ses liards, i destrugét s’carcasse,
Eiét l’péquèt roulét toudi.
In joû qu’il estèt plaîn, on l’ramoéne à s’mogeonne,
Kerchi ! qui n’savét pu s’qui fiét !
V’la s’fémme qui l’d’hesbie rade, ét l’li sat’che ess’maronne,
Tout d’in coup elle pinse à n’saquoèt :
Elle s’éva à dadaye chéz s’matante Margot Botte,
Pou avoé à presté lés affaires d’intermint :
Elle prîn l’civière ét l’drap, lès chand’lès, eiét l’trotte,
Arîngi s’n’homme, comme s’il estét môrt estant plain.
Quand il a ieu pettét s’plangére,
I s’restint, drouve sés ouyes, ét r’woéte tout saisi !
— « Quoès’qué c’est d’ça pou în d’allâche, disti ?
« Est-ce qué j’srèt môrt dain m’chique, eiét d’ja in infierre,
« Eièt Magritte veuve despu hière ? »
Là d’su s’feume vint, afutée drôl’démint :
Avèt n’vie mante su s’tiesse,
Su s’dos, enne noère pia d’biésse,
Et in ramon dain s’moin !
Elle li présinte enne taile plenne d’enne dinrée,
Comme on nô dit qu’on mougne par là :
In woétant ça l’soûlée,
S’dit : dé s’coup-ci j’su daîn l’tabac :
— « Eîét ti, qui s’qué t’est, espèce dé mascarade ? »
Disti à s’feume, qui respond copu rade :
— « C’est mi qui vint pôrté l’mingi,
« A lés geins qui sont in infierre !
Et l’choû li respond sain s’bougi :
— « Mai n’vasse né leû pôrté à boère ? »
On zà du mau d’cangi, in vî pèchi d’jônnesse,
I r’vint toudi au d’zeu, pa l’queüwe ou bin pa l’tiesse.