C’faufe ci convéret bin poû l’conseye dé l’régence,
Ousqu’on choési toudi, l’moéyïn qui s’ret l’méyeu,
Mai vire l’homme pou sayï, qui prin l’preûmi l’avance,
V’la l’nœu, disti l’soyeu !
IN LEU QUI PLAITE CONTE IN RNAU.
In leu s’plaindét : qu’on l’liavet pris s’malette !
In r’nau qui n’valet né miœu q’li,
Pa les gindarmes avet sti prîs
Eiét comme ell’coupabe, estet t’nu sû l’cellette.
In sinche, comme juche, dain n’chéyiére ai achi ;
On n’avet né co vu d’affaire si inbrouyie !
Les avocats criint, q’leu voéx d’ai inrouyie !
Il avint d’ja tatlet, pu d’toés joûs sain lachi !
Mai l’juche qui conn’chet més deux drolles,
S’erleffe, ess’grawe, prin n’pénée et l’parolle :
« Ti Leu, disti, tu t’plains, on n’t’a né volét n’dutte !
« Si t’n’as né volét l’Leu, ti R’nau,
« T’as volét brammin d’zautes ! Et tous lés deux tout d’chutte,
« Jé vo zévoye chouffler dain l’trau. »
In d’nant taure à deux gueux, on n’pou né fai d’biestrie ;
L’homme dé keure, accuset pa in vaurin, in sot,
Aura doét quoéque l’aute disse ; dain l’proverbe né d’mintrie :
« On n’est jamai noérci q’pa in noére pot. »
