Ene båke so les bwès d’ l’ Årdene/V

Èn årtike di Wikisource.
Aller à la navigation Aller à la recherche
Emojione 270F.svg Ciste ouve ci egzistêye eto divins ds ôtès ortografeyes : Feller.
I : Des tcheneas å cur
Les tcherieus

- C’ esteut des tcherieus k’ eterpurdént l’ ovraedje di moenner les schoices al gåre a Pwès. La on mestî ki rapoirtéve des sôs ossu, la, valet. Dins tos les cas, po l’ ci ki n’ aveut nén peu d’ s’ uzer les mwins. Ca so l’ tere, on n’ a rén po rén.

Les tcherieus, c’ esteut sovint des djins k’ avént ene niyêye di zwers po les aidî. Et on meteut les djonnes a l’ ovraedje k’ i n’ avént pont d’ ådje, saiss. C’ est k’ il alént lon, la, ces djins la, minme di ç’ tins la. Li vî Zande do Coibjhî racontéve todi ki s’-n onke, ki vikéve seurmint padviè 1870 u inla, - il estént tcherieus, don, e leu måjhon - ebén i plént pårti d’ Lidje et-z end aler disca Paris, la, m’ fi. Et i gn aveut des côpeus d’ boûsse griblé les tchmins, saiss, di ç’ tins la. I faleut-z esse des foirts gayårds po-z eterprinde des voyaedjes pareys. Esse foirt come on boû et awè des rujhes di rnåd po n’ djamåy esse emayî. Sawè ricecler ene rowe, riferer on tchvå, rabistoker on colé et co sawè djouwer avou l’ fizik, s’ i gn aveut dandjî.

Rén d’ té ki l’ tcheriaedje ås schoices di tchenea, po-z awè ene pitite mo påjhûle ovraedje po s’ ripoizer. Sortot k’ ci n’ esteut djamåy bén lon po les moenner evoye, dowê. Et bråmint pus ledjir a tchaspougnî ki des tronces di hesse, paregzimpe.

Po cmincî, i faleut mete les boteas di schoices a voye. A fwait k’ les bokions loyént, les tcherieus tcherdjént ttafwait so ene pitite tcherete ås deus rowes avou deus penes et on caisson avou des rujhales. Cwand i fjhént des grossès tchertêyes, ci n’ esteut nén trop sgur, saiss, ces éndjoles la. Portant i n’ åreut nén yeu stî tins di vni buker a on stok, ca ç’ åreut stî on plan po berôder l’ caisson. Et l’ vî pere l’ åreut todi yeu seu, don. I nd årént atrapé ene, di ratournêye, c’ est mi ki vos l’ dit, cabén k’ c’ esteut dedja des grands foirts djonneas.

- C’ esteut co des tchårs avou des rowes di bwès ?

- Divant l’ guere, åy. Ça moennéve on boucan d’ tos les diåles cwand i passént so les voyes epirêyes. I gn aveut k’ fé d’ mete des sounetes après l’ colé po les djins ôre les atelaedjes ariver. Les rowes di cawoutchou n’ ont vnou k’ après l’ guere. Ci n’ est k’ adon k’ les sounetes ont divnou obligatweres.

- Dou çk’ i metént les schoices on côp k’ elle estént a voye ?

- I les rtcherdjént so on grand tchår ås cwate rowes, deus grandès rowes padrî et deus ptitès rowes padvant. I t’ end årént emantchî ene tcherêye, monami, hôte come ene måjhon. Et pu hay evoye après Pwès, nos djins, avou l’ tchedje di schoices ! Metans ki, so l’ bele voye tårmakêye, c’ esteut ddja bråmint pus åjhey. Les tchvås end alént pyim pyam disca l’ voye di Smoû. Adon i ravént des mwaijhès voyes po dischinde les Lodjes. Lacobén k’ c’ esteut cåzu tote valêye disca Pwès. I gn aveut djusse å pont di tchmin d’ fier k’ est etur Smoû et Pwès ? C’ est on ptit stroet longou tunel k’ il î fwait noer come dins on for (po n’ nén dire come dins l’ trô do cou d’ on negue k’ a magnî do noer boudin). Hi, hi, ti n’ m’ irès nén racuzer a t’ pere, d’ awè dit ça, la. Laddlé, dis-dj’, les djonnes poléns k’ estént atelés po l’ prumî côp avént padecô peu d’ î moussî et i s’ årint co bén yeu ewaeré. Il esteut d’ kession k’ i soeyénxhe atelés avou on vî tchvå åjhey a moenner et bén schoûtant.

Pu ç’ côp la, après l’ pont, t’ aveus ene dierinne pitite gritchete divant d’ ariver a l’ sitåcion.

- Dijhoz, ô, mononke, cwand il avént tcherdjî les schoices so les vagons, eyou çk’ on les moennéve ?

- Tot doûs, tot doûs, ni nos ewaerans nén non pus, la, nozôtes ! Po cmincî, les tcherieus si dvént arindjî po-z ariver avou deus u k’ c’ est troes tcherêyes so l’ minme djoû. Ôtrumint, si la bene do vagon n’ åreut nén yeu stî rimpleye a houpe, i dvént payî l’ tchômaedje do vagon. Adon, cwand ki l’ vagon esteut fén plin, li trén l’ moennéve edou çk’ i gn aveut des moléns ås schoices.

- I gn end aveut bråmint avår ci, dowô, d’ ces moléns la ?

- Nonna, hê ! Les moléns d’ avår ci, c’ esteut bråmint po des mônêyes u des soyaedjes. Mins vo n’ la-t i nén dedja nouv eures? N’ avans dj’ nén assez voeyî po enute, nozôtes ?