Ene båke so les bwès d’ l’ Årdene/VI

Èn årtike di Wikisource.
Aller à la navigation Aller à la recherche
Emojione 270F.svg Ciste ouve ci egzistêye eto divins ds ôtès ortografeyes : Feller.
I : Des tcheneas å cur
Les moléns ås schoices

- Vén, ô, Firmin; dji t’ a amoenné èn ome d’ après Annvoye, inte Dinant et Nameur. C’ est on ptit viyaedje ou çk’ i gn aveut bråmint des moléns. Onk did zels, c’ esteut on molén ås schoices, dowô Lucyin?

- Oyi, savoz. Divant do vni rexhe e Mouze a Rouyon, nosse pitit rixhot, li Royinete, esteut vayant assez po dner foice a ene dozinne di rowes dissu s’ dierin kilomete di dschindêye. On pleut coner ene rowe di foidje di marixhå, troes po les forneas et les foidjes å fier, ene po l’ polixhoe, troes po des moléns al farene, ene po l’ bressene, ene por on stoirdoe k’ on î fjheut di l’ ôte di fayene, ene soyreye avou les årmeures po soyî l’ mårbe, ene soyreye po rceper les plantches, et ene pus ptite rowe po bouwêye et les ahesses do tchestea. Et pu nos avéns li fameuse rowe po l’ molén å schoices (k’ i prononce « chwache »).

- Dijhoz, ô, nonnonke, des « chwache », c’ est des « scwâces » ?

- Bén åy, va; a Nameur on dit des « chwaches », et ciddlé on dit des « scwâces », et après Lidje on dit des « hwaces » u, des plaeces k’ i gn a, dès « hwèces ». I gn è mwintes walons, mins on s’ doereut tertos bén comprinde, don.

- Oyi, don; ti voes, m’ fi, c’ esteut po cobroyî les schoices di pelozeas et fé rexhe li tan po taener les peas. Les rowes avént tertotes leu bî po lezî amoenner l’ côp d’ aiwe po les mete e-n erote et les fé låtchî e l’ rissaetchant.

- Djusse! I gn a co ene soyreye a Viyance k’ aléve come ça disca nawaire. Minme co asteure, li mônî do Sårt moud co todi a l’ aiwe. C’ est k’ ça n’ costêye rén, la, valet, li foice del aiwe. Dandjreus k’ i gnè dveut awè des moléns ås schoices avår ci ossu, va, mins dji nd a djamåy oyou cåzer. On les loméve cobén padecô les schoirçåds, dowô ?

- Dji pinse bén. C’ esteut les « hwerçås », sapinse k’ on dit eviè Lidje. Li tan, c’ esteut l’ meyeu des cayets ki rexhént foû do molén. On l’ voyive ås taenreyes. Adon, i gnè dmoréve co les resses ki divnént del schafiote di l’ eschoice. Pask’ i fåt bén sondjî k’ on molén ås schoices, c’ est come on molén d’ mônî u on stoirdoe. Li molén al farene, i gnè rexhe d’ on costé la mônêye et d’ èn ôte des costés des resses ki c’ est les latons et les raboulèts. Dins on stoirdoe, c’ est parey : on tire l’ ôle - ki ça soye do lén, u des fayenes et des djaeyes dinltins - et pu après k’ les grinnes ont yeu stî spoujheyes di leu-z ôle, çou ki dmeure, c’ est les torteas k’ on pout dner a magnî ås biesses. Adon, les resses do molén ås schoices, on les ramasséve et on les meteut dins ene platene po-z è fé des hotchets d’ troufe.

- Cwè çki c’ est, des hotchets d’ troufe ?

- C’ est come des ptitès briketes di troufe.

- C’ esteut del troufe come on end aléve cweri dins les prés et les fagnes d’ avår ci ?

- Nonna, hin, ci troufe la, dj’ è cåzrans èn ôte djoû. Cisse-ciale, on l’ loméve « troufe » pask’ on l’ broûléve ossu, et k’ elle sinteut on pô come li troufe des troufreyes. Les ovrîs ki fjhént les mitchots d’ troufe, on les loméve des troufleus. C’ esteut bråmint après Ståvleu k’ on fjheut ç’ mestî la.

- Et dins les taenreyes, cwè çk’ i buziként avou l’ tan ?

- I m’ shonne ki dj’ avans ddja bén assez copiné po enute, la, mi. Si dj’ leyéns nosse soçon d’ Annvoye end aler coûtchî, ca vs estoz hodé, dandjreus, après on voyaedje parey ? Et dj’ irans doirmi ossu, nozôtes. K’ è diss, Firmin ?