Ene båke so les bwès d’ l’ Årdene/IV

Èn årtike di Wikisource.
Ciste ouve ci egzistêye eto divins ds ôtès ortografeyes : Feller-Léonard.
I : Dès tchènês ou cûr
Li pezaedje des schoices

- On côp k’ les schoices estént bén souwêyes, et k’ i gn aveut on moncea gros assez po-z è fé kékes tchertêyes, on houkive li comis et les tcherieus. Ça touméve sovint so l’ fén do moes d’ djulete, après li fnå et divant d’ ataker l’ awousse. On haetchive les schoices djus del souwinne et on les arindjive a boteas d’ a pô près 25 kilos.

- Et comint çk’ on les pezéve ? C’ esteut a pô près; ça n’ vineut nén a on poy, dandjreus.

- Neni, hê, valet. I faleut k’ ça soeye djusse. I n’ åreut nén yeu stî tins d’ rastrinde so l’ pwès. Adon on aveut on pezea. Dj’ end a co onk al cadje å bwès. Vén, ô, dj’ irans pezer ene banse di bwès avou, come ça to voerès bén comint k’ ça va.

To voes, on emantche ene pietche dins l’ anea do pezea. On aspoye onk des dbouts del pietche so si spale, et l’ ôte des costés, on l’ adjoke so on taes d’ bwès u so li spale d’ èn ôte bokion. To fjhos coulisser l’ pwès disca djondant l’ lene des 25 kilos. S’ i gn è mankéve on pô, li båre do pezea rtouméve do costé do pwed. Adon, on rcôpéve on ptit boket a ene ôte eschoice po fé ene bote di 25 kilos djusse. A l’ fén, li båre dimoréve esgure: c’ esteut l’ pwès a on poy près, saiss.

- Et comint çk’ on loyive li bote ?

- Avou des håres di côrî.

- Des cwè ?

- To n’ sés nén çki c’ est k’ des håres di côrî, dowê ? Ebén, cwand to flaxhes djus on topet d’ côrîs, l’ anêye ki t’ abats ene pårt u on cwårtî d’ virêye, t’ el côpes å raeze di tere, don. Et l’ anêye d’ après, les côrîs rdjetèt. Ebén, on purdeut des djetons di deus trwås ans k’ estént bén flitchants et on fjheut des håres avou; come t’ aveus des fåssons di strin po loyî les djåbes.

Tins k’ dj’ esténs ki botlént, li martchand s’ rapoentéve sovint avou on lite, et tins d’ midi, on beveut ene boune gote di blanc peket. Metans k’ on l’ aveut bén wangnî. I gn aveut todi onk u l’ ôte ki rimplixheut dipus k’ a s’ toû, bén seur. Et i gn aveut des cés ki nd avént ene tchårmante padrî l’ oraye al nute, savoz.

Et pu ç’ côp la, après djournêye, u cwand on-z aveut achevé totes ses botes, li martchand payive. Di ç’ tins la, - dji t’ cåze did djusse divant l’ guere -, il è dnéve 7 francs des 25 kilos. Dji m’ sovén co come d’ enute k’ on côp, li vî Biyel Verlinne esteut metou ki beveut l’ café avou les djonnes di noste ådje. Et il esteut ki tuzéve dispu on moumint. Et tuze, et tuze. « Ebén, dit-st i a l’ fén, vozôtes k’ a stî a scole, on nd a 7 francs des 25 kilos; kibén k’ ça fwait do kilo, ça? » «Bén, dit-st i Djåke del Robete, k’ esteut todi pus malén ki ls ôtes, don, lu, i gn a k’ a pårti les 7 francs a 25 bokets et prinde tchaeke boket, et ça frè l’ pris do kilo. Et si vos vloz esse seur ki vos n’ vos ôz nén trompé, i gn a k’ a rconter 25 côps ç’ pris la, et vos dvoz rtoumer so vos 7 francs.»

Bén åy, bén åy, dji n’ î åreus todi djamåy sondjî. Çou k’ c’ est po ça k’ d’ aler a scole, dowê Totor ?»

- I n’ lyi aveut nén co todi dit kibén k’ ça fjheut do kilo.

- Taiss ki non, mins l’ ôte n’ î aveut ddja rén veu, ecramyî k’ il esteut dins tote li teyoreye.

- Et k’ est ç’ ki l’ martchand fjheut avou les schoices ?

- I les faleut monner a l’ gåre a Pwès. Mins ça, ça srè po dmwin, la, ca i m’ shonne ki l’ nutêye est ddja mo beazebén edåmêye, la, mi.