Ene båke so les bwès d’ l’ Årdene/III

Èn årtike di Wikisource.
Aller à la navigation Aller à la recherche
Emojione 270F.svg Ciste ouve ci egzistêye eto divins ds ôtès ortografeyes : Feller-Léonard.
I : Dès tchènês ou cûr
Li souwinne

- A l’ fén del djournêye, on n’ aveut nén ttaleure li tins di rprinde alinne, ca il esteut d’ kession di vitmint ramasser totes les schoices et s’ les emantchî so les gades al souwinne.

- Comint k’ c’ esteut fwait, ça, ene gade al souwinne ?

- Po cmincî, i faleut trover deus beles fotches dins ene hourêye di côrîs. On les afilantixheut a môde di piket, ey on les pikéve dins tere. Pu on meteut deus djanteyes di cwate cénk metes, ene dissu tchaeke fotche, ki s’ riwaitént. Ene djanteye, c’ esteut ene grosse droete pietche k’ on loméve insi. Onk des dbouts del djanteye, on l’ adjokéve so l’ fotche et on poizéve l’ ôte dibout a tere. On meteut todi li costé del pate so l’ fotche et l’ costé do houpî a l’ tere. So ç’ tins la, i gn aveut onk k’ aveut stî spiner kékes côrîs u des ptitès bôles po fé des pietches. On les emantchive etur les deus djanteyes. To voes bén asteure li caisson k’ ça fjhot, don. C’ esteut come on toetea drovou d’ onk des costés. Adon, on etaesléve les schoices dissu. Nén trop spès, hin; djhans : 50 cintimetes hôt, cwè. I n’ è faleut nén mete ditrop, peu k’ ele ni s’ årént yeu estchåfé et k’ elle årént tchamossî. Po fini, ça fjheut ene vraiye pitite cahoute. Et cwand i gnè vneut ene boune drache, on moussive vitmint padzo po s’ mete a l’ coete. On s’ ashieut so des ptits bancs d’ pelozea. On-z î pleut minme fé prandjire on cwårt d’ eure, cwand on-z esteut on pô trop hode tins d’ nonne. C’ est todi come todi, don, tu nd aveus des cis k’ î moussént po bate leu copene minme k’ i n’ åreut ploû k’ ene pitite fene walêye u k’ i n’ åreut co fwait ki d’ brouhiner, tins. Dji m’ sovén co come d’ enute do valet do Moenne: i nnî faleut waire, saiss, a ci-la, po n’ nén dire k’ i nnî faleut pont. Il esteut todi stitchî padzo l’ souwinne. Et s’ pere k’ esteut ki l’ houkive e boerlant: «Vén bouter, ti, po on feneyant. T’ es co pus feneyant k’ on djonne d’ oûsse, ki t’ n’ es nén d’ Our, portant[1]. T’ årès des pûs, mildju, des pûs come des baloujhes.»

- Dijhoz, nonnonke, kibén d’ tins k’ on les leyive e l’ souwinne, les schoices ?

- Ça, ça dipindeut bråmint di tins k’ i fjheut. I les î faleut todi leyî assez lontins po l’ eschoice si bén saiwer. S’ i lujheut l’ solea des cwate costés, i n’ faleut nén dpus d’ troes samwinnes. Ci côp la, si t’ atrapéves ene termene di plouve, i les faleut laire souwer on moes et dmey disca deus gros moes.

- On fjheut bråmint d’ gades al souwinne so ene pårt ?

- On è fjheut disca tant k’ i gn aveut des tcheneas a peler, des cis ki n’ estént nén grifés, bén seur. Voess tu bén, hê, les gåres vinént grifer les tcheneas k’ on n’ pleut nén peler. Mins des côps, li comis do martchand dijheut d’ peler des tcheneas k’ estént markés. Paski pocwè? Pus çk’ i gn aveut des tcheneas d’ grifés, moens ki l’ martchand aveut di schoices, don, lu. Ni roveye nén çou ki dj’ t’ a dit ersè: li martchand, lu, il aveut atchté tote li virêye a l’ comene.

- Kî k’ c’ esteut, ci comis la ki vos djhîz ttaleure ?

- C’ esteut onk do viyaedje ki vneut fé do lanchtoûne dé les peleus, et a l’ fén, ki les payive. C’ esteut sovint on caftî. Ciddé, c’ esteut Djhan did mon l’ Agaesse, ki tnént cafè ås Mizeres. Vla, wai, k’ on côp, i s’ dispite avou l’ gåre; et s’ li traitî d’ tos les nos; et s’ lyi dire ki s’ feme esteut ene guimbixhe. Cist anêye la, les tcheneas ont stî contés, da, c’ est mi ki vos l’ dit. Minme ki l’ brigåde a stî vnowe esprès do Tchestea; et on a rtourné totes les pietches po vey s’ i gn aveut pont d’ côp d’ grifet so les schoices k’ estént a l’ souwinne.

Pî-note

  1. a cåze do spot des cis d' Our, les Oûrsons.